കൊച്ചി: ബാറുകളുടെ ദൂരപരിധി സ്‌കൂളുകളില്‍നിന്നും ആരാധനാലയങ്ങളില്‍നിന്നും 50 മീറ്റര്‍ ആയി കുറച്ചതിന് പിന്നില്‍ 500 കോടി രൂപയുടെ അഴിമതിയുണ്ടെന്നും അന്വേഷണത്തിന് തയാറാണെങ്കില്‍ തെളിവ് നല്‍കുമെന്നും കെ.പി.സി.സി പ്രസിഡന്റ് എം.എം ഹസന്‍.
ഇടതുസര്‍ക്കാരിന്റെ മദ്യനയത്തിനെതിരേ ജില്ലാ കോണ്‍ഗ്രസ് കമ്മിറ്റി നടത്തിയ കലക്ടറേറ്റ് ധര്‍ണ ഉദ്ഘാടനം ചെയ്യുകയായിരുന്നു അദ്ദേഹം. വോട്ടിന് നോട്ട് എന്നതിന് പകരം വോട്ടിന് ബാറുകള്‍ എന്ന രഹസ്യ അജന്‍ഡയാണ് ബാര്‍മുതലാളിമാരുമായി ഇടതുപക്ഷം ഉണ്ടാക്കിയത്.
പുതിയ മദ്യനയത്തിലൂടെ ഇടതുസര്‍ക്കാര്‍ സുപ്രിം കോടതി വിധി അട്ടിമറിക്കാന്‍ ശ്രമിക്കുകയാണ്. രാജ്യം ഭരിക്കുന്ന കോട്ടിട്ട മോദിയും കേരളത്തിലെ മുണ്ടുടുത്ത മോദിയും ജനങ്ങളുടെ ജീവിതം ദുരിതത്തിലാക്കുകയാണെന്നും ഹസന്‍ പറഞ്ഞു.