അഞ്ചല്‍: കഴിഞ്ഞ 35 വര്‍ഷക്കാലത്തോളം റോഡ് തകര്‍ച്ചയില്‍ കഴിഞ്ഞിരുന്ന ഓയില്‍ പാം തോട്ടത്തിന് നടുവില്‍ പട്ടയഭൂമിയില്‍ കഴിയുന്ന കൊച്ചുകുളം നിവാസികളുടെ ചിരകാലസ്വപ്‌നം സാക്ഷാല്‍കരിച്ചു.
ഒരു കിലോമീറ്റര്‍ ദൂരദൈര്‍ഘ്യമുള്ള ഈ റോഡിന്റെ തകര്‍ന്നു കിടന്ന 300 മീറ്റര്‍ ഭാഗം എം.പി ഫണ്ടില്‍ നിന്ന് ഏഴ് ലക്ഷം രൂപ അനുവദിച്ചാണ് കോണ്‍ക്രീറ്റ് ചെയ്തത്. വിവിധ രാഷ്ട്രീയ പാര്‍ട്ടികള്‍ ഇലക്ഷന്‍ സമയങ്ങളില്‍ വന്ന് മോഹന വാഗ്ദാനം നല്‍കി പോകുകയും ജനപ്രതിനിധി ആവുന്നതോടെ ഈ പ്രദേശത്ത് തിരിഞ്ഞു നോക്കാറില്ലെന്നും പ്രദേശവാസികള്‍ പറയുന്നു. റോഡിന്റെ അവശേഷിക്കുന്ന ഭാഗം ജെ.സി.ബി ഉപയോഗിച്ച് എര്‍ത്ത്‌വര്‍ക്ക് നടത്തിയതിനാലാണ് ഇപ്പോള്‍ ഈ റോഡ് സഞ്ചാരയോഗ്യമാത്.
മഴ ശക്തമാകുന്നതോടെ റോഡിലെ മണ്ണ് ഒലിച്ചുപോയി കുഴികള്‍ രൂപപ്പെട്ടാല്‍ വീണ്ടും റോഡ് പഴയപടി ആകുമെന്നും, റോഡിന്റെ അവശേഷിക്കുന്ന ഭാഗം ടാറിങ്ങോ കോണ്‍ക്രീറ്റോ ചെയ്യുന്നതിനുള്ള നടപടി ജനപ്രതിനിധികളുടെ ഭാഗത്തുനിന്ന് ഉണ്ടാകണമെന്നും പ്രദേശവാസികള്‍ പറഞ്ഞു.