കാക്കനാട്: പാലാരിവട്ടം കുമാരപുരം റൂട്ടിലെ പൊട്ടിപ്പൊളിഞ്ഞ കാക്കനാട് സിവില്‍ലൈന്‍ റോഡിന്റെ ശോചനീയവസ്ഥ പരിഹരിക്കണമെന്നാവശ്യപ്പെട്ട് യൂത്ത്‌ലീഗ് തൃക്കാക്കര മുനിസിപ്പല്‍ കമ്മിറ്റിയുടെ നേതൃത്വത്തില്‍ യാചന സമരം നടത്തി.
ആലിന്‍ചുവട് മുതല്‍ കുന്നുംപുറം വരെ പൊട്ടിത്തകര്‍ന്ന ഭാഗങ്ങള്‍ സഞ്ചാരയോഗ്യമാക്കാന്‍ റോഡുകളുടെ അറ്റകുറ്റപ്പണിക്കായി സര്‍ക്കാര്‍ 25 ലക്ഷം രൂപ അനുവദിച്ച് ഉത്തരവായിട്ടും ടെണ്ടര്‍ നടപടി പൂര്‍ത്തിയാക്കാത്ത പൊതുമരാമത്ത് അധികാരികളുടെ അനാസ്ഥക്കെതിരേ ചെമ്പുമുക്ക് ജങ്ഷനില്‍ നിന്നും ആരംഭിച്ച യാചന സമരം എന്‍.ജി.ഒ കോര്‍ട്ടേഴ്‌സിലെ പി.ഡബ്ല്യു.ഡി ഓഫിസിനു മുന്നില്‍ സമാപിച്ചു.
യൂത്ത്‌ലീഗ് മുനിസിപ്പല്‍ പ്രസിഡന്റ് പി.എം മാഹിന്‍കുട്ടി, വൈസ് പ്രസിഡന്റ് മുഹമ്മദ് സാബു എന്നിവരുടെ നേതൃത്വത്തിലാണ് യാചന സമരം നടത്തിയത്.
യൂത്ത്‌ലീഗ് മുനിസിപ്പല്‍ ജനറല്‍ സെക്രട്ടറി കെ.എന്‍ നിയാസ്, സംസ്ഥാന കൗണ്‍സില്‍ അംഗം കെ.കെ അക്ബര്‍,സെക്രട്ടറിമാരായ ഷെഫീഖ്, സനൂബ് കെ.എച്ച്, മണ്ഡലം വൈസ് പ്രസിഡന്റുമാരായ സി.എസ് സിയാദ്, മുഹമ്മദ് കുഞ്ഞ്, യൂണിറ്റ് ഭാരവാഹികളായ ഷിഹാബുദ്ദീന്‍, മുഹമ്മദ് അസ്ലം, കെ.ബി മുഹമ്മദ്, അന്‍സാര്‍,സലിം തൃക്കാക്കര, ഫര്‍ഷാദ്, തുടങ്ങിയവര്‍ സമരത്തില്‍ സംബന്ധിച്ചു. മുസ്ലിംലീഗ് മുനിസിപ്പല്‍ പ്രസിഡന്റ് ഹംസ മൂലയില്‍, ജനറല്‍ സെക്രട്ടറി ടി.എം അലി തുടങ്ങിയവര്‍ സമരത്തിന് അഭിവാദ്യമര്‍പ്പിച്ചു.