കണ്ണൂര്‍: സഹകരണ ബാങ്കില്‍ നിന്ന് കോടികളുടെ ധനാപഹരണം നടത്തി വിദേശത്തേക്ക് മുങ്ങിയ ബ്രാഞ്ച് മാനേജരെ ഇന്റര്‍പോളിന്റെ സഹായത്തോടെ കണ്ണൂര്‍ പൊലിസ് അറസ്റ്റ് ചെയ്തു. കണ്ണൂര്‍ പാറക്കണ്ടിയിലെ ജംസ് ഹൗസില്‍ കെ.പി.മുഹമ്മദ് ജസീലിനെയാണ് ഡിവൈ.എസ്. പി പി.പി.സദാനന്ദനും സംഘവും അറസ്റ്റ് ചെയ്തത്.
2010-2013 കാലയളവില്‍ വളപട്ടണം സഹകരണ ബാങ്കിന്റെ മന്ന ബ്രാഞ്ച് മാനേജറായിരിക്കെ മൂന്നരക്കോടി രൂപയോളം വിലവരുന്ന സ്വര്‍ണം ബാങ്കില്‍ നിന്ന് കവര്‍ന്ന പരാതിയിലാണ് അറസ്റ്റ്. ബാങ്ക് സെക്രട്ടറിയുടെയും പ്രസിഡന്റിന്റെയും അറിവോടെയായിരുന്നു തട്ടിപ്പെന്നു പൊലിസ് പറഞ്ഞു. സഹകരണവകുപ്പ് ഓഡിറ്റിലാണ് തട്ടിപ്പ് കണ്ടെത്തിയത്. സ്വര്‍ണത്തിനു പുറമെ വ്യാജ എഫ്.ഡി സര്‍ട്ടിഫിക്കറ്റ് നിര്‍മിച്ച് 25 ലക്ഷം രൂപയും തട്ടിയെടുത്തിരുന്നു. തട്ടിപ്പ് നടത്തിയ സ്വര്‍ണം കണ്ണൂരിലെ വിവിധ ധനകാര്യ സ്ഥാപനങ്ങളില്‍ പണയപ്പെടുത്തിയ ജസീല്‍ ഈ പണം കൊണ്ട് ബാങ്കോക്കില്‍ സൗന്ദര്യവര്‍ധക ബിസിനസ് നടത്തിവരികയായിരുന്നുവെന്ന് പൊലിസ് പറഞ്ഞു.
ഈ മാസം അഞ്ചിന് ജസീലിനെ ഇന്റര്‍പോള്‍ അറസ്റ്റ് ചെയ്യുകയും അവിടെ ജയിലില്‍ പാര്‍പ്പിക്കുകയുമായിരുന്നു. തുടര്‍ന്ന് ഇന്ത്യന്‍ എംബസിയുമായി ബന്ധപ്പെട്ട് 11നു രാത്രി 10 മണിയോടെ ബാങ്കോക്കില്‍ നിന്ന് നെടുമ്പാശ്ശേരി എയര്‍പോര്‍ട്ടിലേക്ക് കയറ്റിവിടുകയായിരുന്നു. രാത്രി 12 മണിയോടെ ഇയാളെ കേന്ദ്ര രഹസ്യാന്വേഷണ വിഭാഗം ചോദ്യംചെയ്തു. തുടര്‍ന്ന് അന്വേഷണസംഘം കസ്റ്റഡിയിലെടുത്ത് കണ്ണൂരിലെത്തിക്കുകയായിരുന്നു. ബാങ്കോക്കില്‍ അഭയം നല്‍കിയ ആളില്‍ നിന്ന് 78 ലക്ഷം രൂപ ജസീല്‍ കൈക്കലാക്കിയതായും പൊലിസ് പറഞ്ഞു.