നാദാപുരം: തെയ്യം കലാകാരന്റെ വീട് ബി.ജെ.പി ക്കാര്‍ ആക്രമിച്ച സംഭവത്തില്‍ പൊലിസിനെതിരേ സി .പി.എം. വടക്കേ മലബാറിലെ പ്രമുഖ തൈയ്യം കലാകാരന്‍ തൂണേരിയിലെ മഠത്തില്‍ കൊയിലോത്ത് ഫല്‍ഗുണന്റെ വീടിനു നേരെ ആര്‍.എസ്.എസ് പ്രവര്‍ത്തകര്‍ നടത്തിയ അക്രമ കേസ് അട്ടിമറിക്കാനുള്ള പൊലിസ് നീക്കം അവസാനിപ്പിക്കണമെന്ന് ആവശ്യപ്പെ ട്ടാണ് സി.പി.എം രംഗത്തെത്തിയത്.
കഴിഞ്ഞ ദിവസമാണ് ഇയാളുടെ വീട് ബി.ജെ.പി, ആര്‍.എസ്.എസ് പ്രവര്‍ത്തകര്‍ അടിച്ചു തകര്‍ത്തത്. പട്ടികജാതി വിഭാഗക്കാരന്‍ കൂടിയായ തെയ്യം കലാകാരന്റെ വീട് ആക്രമിച്ച കേസില്‍ പ്രതിയെ പൊ ലീസ് കസ്റ്റഡിയിലെടുത്തതിന് ശേഷം വിട്ടയക്കുകയായിരുന്നു. ഇതിനെതിരേ സി.പി.എമ്മിന്റെ പ്രമുഖ നേതാക്കള്‍ തന്നെ രംഗത്തെത്തി. പൊലിസ് ആര്‍. എസ്.എസിന്റെ സംരക്ഷകരാകരുതെന്ന് സി.പി.എം നാദാപുരം ഏരിയാ കമ്മിറ്റി പ്രസ്താവനയില്‍ ആവശ്യപ്പെട്ടു. കേസിലെ പ്രതിയായ വെല്ലൂര്‍ താഴകുനി ശ്യാമിനെയാണ് കസ്റ്റഡിയില്‍ എടുത്ത് വിട്ടയച്ചത്. ഡി.വൈ.എഫ്.ഐ, സി.പി.എം പതാകകള്‍ നശിപ്പിച്ചതായും ഡി.വൈ.എഫ്.ഐ തൂണേരി മേഖലാ കമ്മിറ്റി അംഗം നിഖില്‍ ലാലിനെ വീട്ടില്‍ കയറി വധഭീഷണി മുഴക്കിയതായും സി.പി.എം ആരോപിച്ചു.
ഫല്‍ഗുണനെ പട്ടികജാതി പേര് വിളിച്ച് അധിക്ഷേപിക്കുകയും വീട്ടമ്മയായ പുഷ്പയെയും മകന്‍ വിഷ്ണുവിനെയും മര്‍ദിച്ച് പരുക്കേല്‍പ്പിക്കുകയും ചെയ്തിട്ടും പൊലിസ് ജാഗ്രതയോടെ കേസ് അന്വേഷിക്കാനോ മൊഴി രേഖപ്പെടുത്താനോ തയാറായിട്ടില്ല. പ്രതികളെ കേസില്‍ നിന്ന് രക്ഷപ്പെടുത്താനാണ് പൊലിസ് ശ്രമിക്കുന്നത്. ക്രിമിനലുകളെ സംരക്ഷിക്കാനുള്ള പൊലിസ് നീക്കം നാടിന്റെ സമാധാനം തകര്‍ക്കും. തുടങ്ങിയ ആരോപണവുമായാണ് സി.പി.എം രംഗത്തെത്തിയത്.
അക്രമികളെ രക്ഷപ്പെടുത്തുകയും നിരപരാധികളെ പീഡിപ്പിക്കാനുമുള്ള നിലപാട് സംഘര്‍ഷം വര്‍ധിപ്പിക്കും. വീടാക്രമണ കേസിലെ മുഴുവന്‍ പ്രതികളെയും അറസ്റ്റ് ചെയ്ത് നിയമത്തിനു മുന്നില്‍ കൊണ്ടുവരണമെന്ന് ഏരിയാ സെക്രട്ടറി പി.പി ചാത്തു പ്രസ്താവനയില്‍ ആവശ്യപ്പെട്ടു.
ഇതിന് തൊട്ട് മുന്‍പുള്ള ഓണനാളില്‍ പെരുവങ്കര വെച്ച് ഓണപ്പൊട്ടന്റെ തെയ്യം കെട്ടിയ സജേഷ് എന്ന തെയ്യം കലാകാരനെ ആര്‍.എസ്.എസ് പ്രവര്‍ത്തകര്‍ ആക്രമിച്ച സംഭവത്തിലും പ്രതികളെ പൊലിസ് സംരക്ഷിക്കുന്നതായി ആരോപിച്ച് സി.പി.എം ഉള്‍പ്പെടെ യുള്ള സംഘടനകള്‍ രംഗത്തെത്തിയിരുന്നു. ഇത് സംബന്ധമായ കേസ് ഇപ്പോഴും ഹൈക്കോടതിയില്‍ നടക്കുകയാണ്.