തിരൂരങ്ങാടി: ഡ്രൈവിങ് ടെസ്റ്റിനെത്തുന്നവര്‍ക്ക് തത്സമയ ക്ലാസുമായി മോട്ടോര്‍വാഹന വകുപ്പ്. തിരൂരങ്ങാടി സബ് ആര്‍.ടി.ഓഫിസിനുകീഴിലെ എം.വി.ഐ മാരാണ് പൂക്കിപ്പറമ്പ് കണ്ടംചിറ മൈതാനത്ത് ക്ലാസ് നടത്തിവരുന്നത്. ലേണിങ് ടെസ്റ്റ് എഴുതുവാന്‍ എത്തുന്നവര്‍ക്ക് നിലവില്‍ സിവില്‍ സ്റ്റേഷനില്‍ വെച്ച് ദിവസവും ക്ലാസ് നല്‍കുന്നുണ്ട്. ഇതിനുപുറമെയാണ് രാവിലെ എട്ട് മണിമുതല്‍ 8.30 വരെ കോഴിച്ചെനയിലെ ക്ലാസ്സ്. അപകടം കുറക്കുക, മെച്ചപ്പെട്ട ഡ്രൈവിങ്, സീറ്റ് ബെല്‍റ്റ്, ഹെല്‍മറ്റ് ,എന്നിവ ധരിക്കേണ്ടതിന്റെ ആവശ്യകത എന്നിവയെ കുറിച്ചാണ് ബോധവല്‍ക്കരണം നല്‍കുന്നത്.
തികച്ചും സൗഹൃദപരമായിട്ടുള്ള ഈ ക്ലാസിലൂടെ മോട്ടോര്‍വാഹനവകുപ്പും ഡ്രൈവര്‍മാരും തമ്മിലുള്ള അകലം കുറക്കാന്‍ സാധിക്കുന്നതായി ഡ്രൈവര്‍മാര്‍ പറഞ്ഞു. എം.വി. ഐമാരായ സി.കെ അജില്‍കുമാര്‍, വി. അനുമോദ് കുമാര്‍, എ.എം.വി.ഐമാരായ ചാലില്‍ അബ്ദുല്‍ കരീം, പി.സി അരുണ്‍കുമാര്‍, എം.വി അരുണ്‍ എന്നിവരാണ് ക്ലാസിന് നേതൃത്വം നല്‍കുന്നത്.