മലപ്പുറം: നഴ്‌സിങ് റിക്രൂട്ട്‌മെന്റില്‍ സ്വകാര്യ മാഫിയകള്‍ക്ക് ഇടപെടാന്‍ അവസരമൊരുക്കി കേന്ദ്ര സര്‍ക്കാര്‍. സര്‍ക്കാര്‍ ഏജന്‍സി വഴി മാത്രമേ നഴ്‌സിങ് റിക്രൂട്ട്‌മെന്റ് നടത്താവൂ എന്ന നിബന്ധന കേന്ദ്രസര്‍ക്കാര്‍ എടുത്തുകളഞ്ഞു. നോര്‍ക, ഒഡാപെക്, ഓവര്‍സീസ് മാന്‍പവര്‍ കോര്‍പറേഷന്‍ തുടങ്ങി ആറ് സര്‍ക്കാര്‍ ഏജന്‍സികള്‍ മുഖേനയായിരുന്നു കുവൈത്തിലേക്ക് നഴ്‌സുമാരെ റിക്രൂട്ട് ചെയ്തിരുന്നത്. സ്വകാര്യ ഏജന്‍സികള്‍ ഉദ്യോഗാര്‍ഥികളെ ചൂഷണം ചെയ്യുന്നുവെന്നും വന്‍ തുക കോഴ വാങ്ങുന്നുവെന്നുമുള്ള ആരോപണങ്ങളെ തുടര്‍ന്നാണ് റിക്രൂട്ട്‌മെന്റ് സര്‍ക്കാര്‍ ഏജന്‍സികള്‍ വഴിയാക്കിയത്.
നഴ്‌സിങ് റിക്രൂട്ട്‌മെന്റില്‍ സ്വകാര്യ മേഖലയുടെ ചൂഷണം ഒഴിവാക്കുക എന്ന ലക്ഷ്യത്തോടെയാണ് 2015 ഏപ്രില്‍ മുതല്‍ റിക്രൂട്ട്‌മെന്റ് സര്‍ക്കാര്‍ ഏജന്‍സികള്‍ വഴി മാത്രമാക്കിയത്. റിക്രൂട്ട്‌മെന്റിന് സ്വകാര്യ ഏജന്‍സികള്‍ 20 ഉം 25 ഉം ലക്ഷം രൂപവരെ ഈടാക്കുകയും കുവൈത്തിലേക്കടക്കം വിവിധ രാജ്യങ്ങളിലേക്ക് നടന്ന റിക്രൂട്ട്‌മെന്റുകളില്‍ വ്യാപക തട്ടിപ്പ് നടന്നതായും പരാതി ഉയര്‍ന്നിരുന്നു. കേന്ദ്രസര്‍ക്കാറിന്റെ പുതിയ ഉത്തരവ് നഴ്‌സിങ് റിക്രൂട്ട്‌മെന്റ് മേഖലയിലെ ചൂഷണങ്ങള്‍ വര്‍ധിക്കാന്‍ ഇടയാക്കും. ഏതുവിധേനയും ജോലിയില്‍ കയറിപ്പറ്റാനാണ് ഒരു വിഭാഗം ഉദ്യോഗാര്‍ഥികള്‍ക്ക് താല്‍പര്യം. ഇത് മുന്നില്‍കണ്ടാണ് സ്വകാര്യ ഏജന്‍സികള്‍ ഉദ്യോഗാര്‍ഥികളെ ചൂഷണം ചെയ്യുന്നത്.