റിയാദ്: റഷ്യയുമായി വിവിധ മേഖലയില്‍ സഹകരണം ശക്തമാക്കുമെന്ന് സഊദി വിദേശ കാര്യ മന്ത്രി ആദില്‍ ജുബൈര്‍ വ്യക്തമാക്കി. വാണിജ്യം, നിക്ഷേപം, സുരക്ഷ, സാമ്പത്തികം എന്നീ മേഖലകളില്‍ റഷ്യയുമായയുള്ള സഹകരണം ശക്തമാക്കുമെന്നും മേഖലയിലെ സുരക്ഷക്ക് സഊദിക്ക് റഷ്യയുടെ പൂര്‍ണ്ണ പിന്തുണ പ്രഖ്യാപിച്ചുണ്ടെന്നും ആദില്‍ അല്‍ ജുബൈര്‍ പറഞ്ഞു. കൂടാതെ, വിദ്യാഭ്യാസം, ശാസ്ത്രം , സാങ്കേതികം തുടങ്ങിയ മേഖലകളിലും ഇരു രാജ്യങ്ങളും പരസ്പര സഹകരണം ശക്തമാക്കും.

അന്താരാഷ്ട്ര വിപണിയില്‍ എണ്ണ വില ഉയര്‍ത്താനുള്ള ശ്രമം ഇനിയും തുടരും. ഇതിനായി റഷ്യയുമായി സഹകരിച്ച് എണ്ണ ഉല്‍പാദനം നീട്ടാനും ധാരണയുണ്ട്. എണ്ണയുല്‍പാദക രാജ്യങ്ങളുടെ കൂട്ടായ്മയായ ഒപെക്കിനു പുറത്തു സഊദിയുമായി സഹകരിക്കാനാണ് റഷ്യയുടെ തീരുമാനം. ഇത് പ്രകാരം വരുന്ന മാര്‍ച്ചിന് ശേഷവും എണ്ണയുല്‍പാദന നിയന്ത്രണം തുടരാനാകുമെന്നാണ് സഊദിയടക്കമുള്ള എണ്ണയുല്‍പാദക രാജ്യങ്ങള്‍ കരുതുന്നത്. റഷ്യ ഉള്‍പ്പെടെ 11 രാജ്യങ്ങള്‍ എണ്ണയുല്‍പാദന നിയന്ത്രണത്തിന് പിന്തുണ അറിയിച്ചിട്ടുണ്ട്. റഷ്യയുടെ സഹകരണത്തോടെയാണ് ദിനേന 18 ലക്ഷം ബാരല്‍ ക്രൂഡ് ഓയില്‍ ഉല്‍പാദനം കുറക്കാന്‍ ഒപെക്കിനു സാധ്യമായത്. ഇതേ സഹകരണം ഇനിയും തുടരാനാണ് ധാരണയിലെതിരിക്കുന്നത്.