തിരുവനന്തപുരം: കുമ്മനം രാജശേഖരന്‍ നയിക്കുന്ന ജനരക്ഷായാത്ര സി.പി.എം വിരുദ്ധ കൊലവിളിയാത്രയാക്കി മാറ്റിയിരിക്കുകയാണെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍.
സി.പി.എം കണ്ണൂര്‍ ജില്ലാ സെക്രട്ടറി പി.ജയരാജനെതിരേ കൊലവിളി മുദ്രാവാക്യം വിളിക്കുന്നത് ജാഥയുടെ കണ്‍വീനര്‍ വി.മുരളീധരന്‍ തന്നെ സോഷ്യല്‍ മീഡിയയില്‍ പ്രചരിപ്പിച്ചത് നാട്ടില്‍ അക്രമം വ്യാപിപ്പിക്കാന്‍ ഉദ്ദേശിച്ചാണ്.
യാത്രയുടെ ലക്ഷ്യമെന്താണെന്ന് യാത്രയുടെ കണ്‍വീനര്‍ തന്നെ ഇതിലൂടെ വെളിപ്പെടുത്തിയിരിക്കുകയാണ്. ബി.ജെ.പി. കേരളത്തില്‍ നടത്തിയ കൊലപാതകങ്ങളും അക്രമങ്ങളും മറച്ചുപിടിക്കാനാണ് കേന്ദ്രമന്ത്രിമാരെയും അഖിലേന്ത്യാ നേതാക്കളെയും പങ്കെടുപ്പിച്ചുകൊണ്ട് യാത്ര സംഘടിപ്പിച്ചത്.
പ്രകോപനങ്ങളില്‍ വീഴാതെ ആര്‍.എസ്.എസിന്റെയും ബി.ജെ.പി.യുടെയും യഥാര്‍ഥ മുഖം ജനങ്ങള്‍ക്കു മുന്‍പില്‍ തുറന്നുകാണിക്കാന്‍ മുഴുവന്‍ ജനങ്ങളും മുന്നോട്ട് വരണമെന്ന് കോടിയേരി ബാലകൃഷ്ണന്‍ പ്രസ്താവനയില്‍ പറഞ്ഞു.