തലശ്ശേരി: സിമന്റെന്ന വ്യാജേന പൂഴി കടത്തിക്കൊണ്ടുവന്ന ലോറി നടുറോഡില്‍ കുടുങ്ങി. ഇന്നലെ കാലത്ത് കോടതി റോഡില്‍ പാലിശ്ശേരിയിലാണ് ലോറി കുടുങ്ങിയത്.
മംഗലാപുരം ഭാഗത്തുനിന്നു കോഴിക്കോടേക്ക് അനധികൃതമായി കടത്തിക്കൊണ്ടുവരുന്ന മണല്‍ ലോറിയാണ് തകരാറിനെ തുടര്‍ന്ന് റോഡില്‍ നിന്നു പോയത്.
ഒടുവില്‍ അറ്റകുറ്റപ്പണിക്കു ശേഷം വൈകിട്ടോടെയാണ് ലോറി നീക്കി ഗതാഗതം പുനസ്ഥാപിച്ചത്. ഏതാനും മാസങ്ങള്‍ക്ക് മുന്‍പ് അന
ധികൃതമായി മണല്‍കടത്തിയതിനെ തുടര്‍ന്ന് ഇതേ ലോറി തലശ്ശേരി ട്രാഫിക് എസ്.ഐ വി.വി ശ്രീജേഷും സംഘവും കസ്റ്റഡിയിലെടുത്തിരുന്നു.
സിമന്റെന്ന വ്യാജേനയാണ് മണല്‍ കടത്തിക്കൊണ്ടുവന്നതെന്ന് പൊലിസ് പറഞ്ഞു. ലോറിക്ക് പുറത്ത് വിരിച്ച ടാര്‍പോളിനു മുകളില്‍ സിമന്റ് വിതറിയിരുന്നു. സംശയം തോന്നിയ എസ്.ഐ ടാര്‍പോളിന്‍ നീക്കി ലോഡ് പരിശോധിച്ചപ്പോഴാണ് മണലാണെന്ന് വ്യക്തമായത്. തകരാര്‍ തീര്‍ത്ത് ലോറി തലശ്ശേരി ട്രാഫിക് പൊലിസ് കസ്റ്റഡിയിലെടുത്തു.