കുമ്പള: 'തകര്‍ന്നു വീണ വീട് അറ്റകുറ്റപ്പണി നടത്താന്‍ സഹായിച്ചില്ലെങ്കിലും വേണ്ടില്ല, അധികാരികള്‍ക്കൊന്നു തിരിഞ്ഞു നോക്കാമായിരുന്നു...' തകര്‍ന്നു വീണ ചെറിയ ഓട് മേഞ്ഞ വീടിനു മുന്നില്‍ ഭാര്യയെയും മക്കളെയും ചേര്‍ത്ത് പിടിച്ച് ഇതു പറയുമ്പോള്‍ വിശ്വനാഥന്റെ കണ്ണില്‍ അവഗണനയുടെ കയ്പുനീര്‍ നിറഞ്ഞു. പൈവളിഗെ പഞ്ചായത്തിലെ ധര്‍മ്മത്തടുക്ക കന്യാലടുക്ക എസ്.സി കോളനിയിലെ 55കാരനായ വിശ്വനാഥനും കുടുംബവുമാണ് വീട് തകര്‍ന്നതോടെ പെരുവഴിയിലായത്. വീട് തകര്‍ന്നു 10 ദിവസമായിട്ടും അധികൃതരാരും ഇവിടെയെത്തിയില്ലെന്നു വിശ്വനാഥന്‍ പറയുന്നു. രണ്ടു പെണ്‍മക്കളും ഭാര്യയും മകനുമടങ്ങുന്ന കുടുംബം തകര്‍ന്ന വീടിനു സമീപം ചെറിയ ഷെഡ് കെട്ടിയാണു താമസിക്കുന്നത്.
പത്തു ദിവസം മുമ്പാണ് വിശ്വനാഥന്റെ ചെറിയവീട് പൂര്‍ണമായും തകര്‍ന്നത്. ഇക്കാര്യം അധികൃതരുടെ ശ്രദ്ധയില്‍ പെടുത്താനായി ഇദ്ദേഹം നിരവധി തവണ പഞ്ചായത്ത്, വില്ലേജ് ഓഫിസുകളില്‍ കയറിയിറങ്ങുകയും രേഖാമൂലം പരാതി നല്‍കുകയും ചെയ്തു. എന്നിട്ടും പഞ്ചായത്ത് പ്രസിഡന്റോ വില്ലേജ് അധികാരികളോ ഇങ്ങോട്ട് തിരിഞ്ഞു നോക്കുക പോലും ചെയ്തില്ലെന്ന് വിശ്വനാഥന്‍ പറയുന്നു. ശരീരത്തിന്റെ ഒരു ഭാഗം തളര്‍ന്ന വിശ്വനാഥന്‍ വീട് തകര്‍ന്നതിനു ശേഷം എല്ലാ ദിവസവും രാവിലെ മുതല്‍ ഓഫിസുകളില്‍ ചെന്ന് അധികാരികളുടെ വാതില്‍ മുട്ടിയെങ്കിലും ഫലം നിരാശ മാത്രമായിരുന്നു.
ഭാര്യ സുന്ദരിക്കും മക്കളായ വിനോദ് , വിനുത, വിനയ് എന്നിവര്‍ക്കുമൊപ്പമാണ് ഇദ്ദേഹം തകര്‍ന്നു വീഴാറായ വീട്ടില്‍ താമസിച്ചിരുന്നത്. ഉണ്ടായിരുന്ന വീടും തകര്‍ന്ന് വീണതോടെ വികലാംഗയായ ഒരു മകളടക്കമുള്ള കുടുംബത്തോടൊപ്പം പെരുവഴിയില്‍ താമസിക്കേണ്ടി വന്നിരിക്കുകയാണ് വിശ്വനാഥന്. വല്ലപ്പോഴും ഭാര്യ സുന്ദരിക്കു ലഭിക്കുന്ന കൂലിവേലയും സുമനസുകളുടെ സഹായം കൊണ്ടുമാണ് അഞ്ചംഗ കുടുംബം പട്ടിണിയില്ലാതെ കഴിയുന്നത്. രോഗിയായ ഇവര്‍ക്കു മരുന്നു വാങ്ങാന്‍ ഏറെ ബുദ്ധിമുട്ട് നേരിടുകയാണ്.