ലണ്ടന്‍: സീസണില്‍ മിന്നും ഫോമില്‍ കുതിക്കുന്ന ഇംഗ്ലീഷ് പ്രീമിയര്‍ ലീഗ് ടീം മാഞ്ചസ്റ്റര്‍ സിറ്റിയുടെ മുന്നേറ്റങ്ങള്‍ക്ക് ചുക്കാന്‍ പിടിക്കുന്ന സെര്‍ജിയോ അഗ്യെറോയ്ക്ക് അപൂര്‍വ റെക്കോര്‍ഡ്. മാഞ്ചസ്റ്റര്‍ സിറ്റിക്കായി ഏറ്റവും കൂടുതല്‍ ഗോള്‍ നേടിയ താരമെന്ന റെക്കോര്‍ഡ് ഇനി അര്‍ജന്റീന മുന്നേറ്റ താരത്തിന് സ്വന്തം. ചാംപ്യന്‍സ് ലീഗ് പോരാട്ടത്തില്‍ നാപോളിക്കെതിരേ ഗോള്‍ നേടിയാണ് അഗ്യെറോ റെക്കോര്‍ഡ് സ്വന്തം പേരിലാക്കിയത്. നാപോളിക്കെതിരേ അഗ്യെറോ സിറ്റിക്കായി നേടിയത് തന്റെ 178ാം ഗോളായിരുന്നു. എറിക്ക് ബ്രൂക്കിന്റെ റെക്കോര്‍ഡാണ് അഗ്യെറോ പഴങ്കഥയാക്കിയത്.
അഞ്ച് വര്‍ഷം അത്‌ലറ്റിക്കോ മാഡ്രിഡിനായി കളിച്ച ശേഷമാണ് 2011ല്‍ അഗ്യെറോ സിറ്റിയിലേക്ക് കൂടുമാറിയത്. കഴിഞ്ഞ ആറ് വര്‍ഷമായി സിറ്റിയുടെ മുന്നേറ്റത്തിന്റെ കടിഞ്ഞാണേന്തുന്നത് അഗ്യെറോയാണ്. ഇടക്ക് ഫോമില്ലാതെ കുഴങ്ങിയെങ്കിലും കഴിഞ്ഞ സീസണില്‍ പെപ് ഗെര്‍ഡിയോള കോച്ചായി എത്തിയ ശേഷം ടീമിലെ പ്രധാന താരമായി അര്‍ജന്റൈന്‍ മുന്നേറ്റക്കാരന്‍ മാറുകയായിരുന്നു. നിലവില്‍ ഡി ബ്രുയ്‌നെ മധ്യനിരയിലെ അച്ചുതണ്ടാക്കി അഗ്യെറോയെ മുന്നേറ്റത്തില്‍ സ്വതന്ത്രമാക്കി വിടുന്ന തന്ത്രങ്ങളിലൂടെയാണ് പെപ് സിറ്റിയെ മുന്‍നിരയില്‍ നിര്‍ത്തുന്നത്.