തിരുവനന്തപുരം: സോളാര്‍ കേസിലെ അനിശ്ചിതത്വങ്ങള്‍ നീങ്ങുന്നു. കേസില്‍ തുടരന്വേഷണം പ്രഖ്യാപിച്ച സര്‍ക്കാരിന്റെ നടപടികള്‍ക്ക് ആശ്വാസമായി നിയമോപദേശം. സോളാര്‍ കേസില്‍ തുടരന്വേഷണം ആകാമെന്നാണ് നിയമോപദേശം നല്‍കിയത്. ജസ്റ്റിസ് അരിജിത്ത് പസായത്ത് ആണ് നിയമോപദേശം നല്‍കിയത്.

മുന്‍ മുഖ്യമന്ത്രി ഉമ്മന്‍ചാണ്ടിയുടെ ഓഫിസിനെ പ്രതിത്തൂട്ടിലാക്കുന്നതാണ് സോളാര്‍ കമ്മീഷന്‍ റിപ്പോര്‍ട്ട്. തട്ടിപ്പിന് സരിതയും ബിജു രാധാകൃഷ്ണനും മുഖ്യമന്ത്രിയുടെ ഓഫിസിനെ ദുരുപയോഗം ചെയ്‌തെന്നും എന്നാല്‍, തട്ടിപ്പ് പൊതുഖജനാവിന് നഷ്ടമുണ്ടാക്കിയിട്ടില്ലെന്നും കമ്മീഷന്‍ കണ്ടെത്തി. കേസന്വേഷിച്ച പൊലിസ് സംഘത്തെ കമ്മീഷന്‍ വിമര്‍ശിച്ചു.

സോളാര്‍ കേസന്വേഷണം സരിതയിലും ബിജു രാധാകൃഷ്ണനിലും മുഖ്യമന്ത്രിയുടെ ഓഫിസിലെ ചിലരിലും സംഘം ഒതുക്കി നിര്‍ത്തി. ഇവരുടെ കൈകളിലെത്തിയ പണത്തെ കുറിച്ചോ പണമിടപാടുകളെ കുറിച്ചോ അന്വേഷണം നടത്തിയില്ല. ഇന്റലിജന്‍സ് റിപ്പോര്‍ട്ടുകള്‍ മുന്‍ സര്‍ക്കാര്‍ അവഗണിച്ചു. നിലവില്‍ ഇത്തരം കേസുകള്‍ കൈകാര്യം ചെയ്യാന്‍ നിലവിലെ നിയമം അപര്യാപ്തമാണെന്നും കമ്മീഷന്‍ റിപ്പോര്‍ട്ടില്‍ പറയുന്നു.