കൃഷ്ണഗിരി (വയനാട്): സി.കെ നായിഡു ട്രോഫി അണ്ടര്‍ 23 ടൂര്‍ണമെന്റില്‍ തമിഴ്‌നാടിനെതിരേ തകര്‍ന്നടിഞ്ഞ് കേരളം. ഒന്നാമിന്നിങ്‌സില്‍ 42 റണ്‍സിനാണ് കേരളം പുറത്തായത്. ടോസ് നേടി ബാറ്റിങ് തിരഞ്ഞെടുത്ത തമിഴ്‌നാടിന്റെ തീരുമാനം തെറ്റിയെന്ന് തെളിയിക്കുന്നതായിരുന്നു കേരളത്തിന്റെ ബൗളിങ് അറ്റാക്ക്. കേവലം 51 ഓവറില്‍ 158 റണ്‍സിന് തമിഴ്‌നാടിന്റെ ഒന്നാമിന്നിങ്‌സ് അവസാനിപ്പിക്കാന്‍ കേരളത്തിനായി. അഞ്ച് വിക്കറ്റെടുത്ത് ആനന്ദ് ജോസഫും നാല് വിക്കറ്റെടുത്ത് ഫനൂസുമാണ് തമിഴ്‌നാടിന്റെ നടുവൊടിച്ചത്.
എന്നാല്‍ മറുപടി ബാറ്റിങ്ങിനിറങ്ങിയ കേരളത്തെ നിലയുറപ്പിക്കും മുന്‍പെ പവലിയനിലെത്തിച്ച് തമിഴ്‌നാട് പകരം വീട്ടി. കേവലം 17 ഓവറുകളുടെ ആയുസേ കേരളത്തിന്റെ ഒന്നാമിന്നിങ്‌സിന് ഉണ്ടായിരുന്നുള്ളു. 18 റണ്‍സെടുത്ത നായകന്‍ സല്‍മാന്‍ നിസാറാണ് കേരളത്തിന്റെ ടോപ് സ്‌കോറര്‍. അഞ്ച് വിക്കറ്റെടുത്ത് അശ്വന്ത് മുകുന്ദനും നാല് വിക്കറ്റെടുത്ത ക്യപ്റ്റന്‍ ജെ കൗഷികുമാണ് കേരളത്തെ തകര്‍ത്തെറിഞ്ഞത്. 42 റണ്‍സില്‍ കേരളത്തിന്റെ ഒന്നാമിന്നിങ്‌സ് അവസാനിപ്പിച്ച തമിഴ്‌നാട് രണ്ടാമിന്നിങ്‌സില്‍ വിക്കറ്റ് പോകാതെ 24 റണ്‍സെന്ന നിലയിലാണ് ആദ്യ ദിനം സ്റ്റമ്പെടുക്കുമ്പോള്‍. 140 റണ്‍സിന്റെ ലീഡും അവര്‍ക്കുണ്ട്.