റിയാദ്: തീവ്രവാദ വേട്ടക്കിടെ കിഴക്കന്‍ സഊദിയില്‍  സൈനികന്‍ വെടിയേറ്റ് മരിച്ചു. കിഴക്കന്‍ പ്രവിശ്യയിലെ ദമാമിലെ ഖത്തീഫിന് സമീപം താറൂത് ദ്വീപില്‍ നടന്ന തീവ്രവാദ വേട്ടക്കിടെയാണ് സുരക്ഷാ ഉദ്യോഗസ്ഥനായ ലഫ്: കേണല്‍ ഫഹദ് അല്‍ ഖതിരി വെടിയേറ്റ് മരിച്ചത്. സഊദി ആഭ്യന്തര മന്ത്രാലയത്തിലെ എമര്‍ജന്‍സി ഫോഴ്‌സ് അംഗമായിരുന്നു ഇദ്ദേഹം . 

തന്റെ കൃത്യ നിര്‍വ്വഹണത്തിനിടെയാണ് സൈനികന്‍ കൊല്ലപ്പെട്ടതെന്ന് ആഭ്യന്തര മന്ത്രാലയ വക്താവ് മേജര്‍ ജനറല്‍ മന്‍സൂര്‍ അല്‍ തുര്‍ക്കി പറഞ്ഞു. ബന്ധപ്പെട്ട വകുപ്പുകള്‍ അന്വേഷണം ഊര്‍ജ്ജിതമാക്കിയിട്ടുണ്ട്. ഏതാനും ദിവസങ്ങള്‍ക്ക് മുന്‍പ് മാത്രം നടന്ന ഖത്തീഫിലെ വെടിവെപ്പില്‍ കൊല്ലപ്പെട്ട സൈനികന്‍ അബ്ദുല്ല അല്‍ ഖഹ്ത്താനിയുടെ പകരക്കാരനായിട്ടാണ് ഫഹദ് അല്‍ ഖതിരി ചാര്‍ജ് ഏറ്റെടുത്തത്.