വടകര: വികസനത്തിന്റെ പേരില്‍ ഏകപക്ഷീയമായി കുടിയൊഴിപ്പിക്കുന്ന നയം എല്‍.ഡി.എഫ് സര്‍ക്കാരിനില്ലെന്നു പൊതുമരാമത്ത് മന്ത്രി ജി. സുധാകരന്‍. സാമൂഹിക നീതിയില്‍ അധിഷ്ഠിതമായ വികസനവും ക്ഷേമവുമാണ് സര്‍ക്കാര്‍ ലക്ഷ്യമെന്ന് അദ്ദേഹം പറഞ്ഞു. ഒന്തം റെയില്‍വേ മേല്‍പ്പാലം-സാന്‍ഡ് ബാങ്ക്‌സ് റോഡ് നവീകരണ പ്രവൃത്തി ഉദ്ഘാടനം ചെയ്യുകയായിരുന്നു അദ്ദേഹം.
പുതിയ സര്‍ക്കാര്‍ വന്നതിന് ശേഷം വടകരയില്‍ പൊതുമരാമത്ത് വകുപ്പ് 100 കോടി രൂപ വികസന പ്രവര്‍ത്തനങ്ങള്‍ക്ക് അനുവദിച്ചു. ഇതില്‍ 20 കോടി രൂപ കേന്ദ്ര റോഡ് ഫണ്ടില്‍ വരും. റോഡുകളുടെ അറ്റുകുറ്റപ്പണികള്‍ക്ക് മാത്രം ഒന്നരക്കോടി രൂപ നല്‍കി. ഗതാഗത സംവിധാനത്തിന് ദീര്‍ഘ വീക്ഷണമാണ് സര്‍ക്കാര്‍ ലക്ഷ്യമിടുന്നതെന്നും സമയബന്ധിതമായി അറ്റകുറ്റ പണികള്‍ പൂര്‍ത്തീകരിക്കാന്‍ ഉദ്യോഗസ്ഥര്‍ ശ്രമിക്കണമെന്നും മന്ത്രി പറഞ്ഞു. സി.കെനാണു എം.എല്‍.എ അധ്യക്ഷനായി. അസിസ്റ്റന്റ് എന്‍ജിനീയര്‍ സജിത്ത് റിപ്പോര്‍ട്ട് അവതരിപ്പിച്ചു. മുനിസിപ്പല്‍ ചെയര്‍മാന്‍ കെ. ശ്രീധരന്‍, പി.കെ ദിവാകരന്‍, പുറന്തോടത്ത് സുകുമാരന്‍, എന്‍.പി.എം നഫ്‌സല്‍, പി. അശോകന്‍, പി. സോമശേഖരന്‍, കൊയിലോത്ത് ബാബു, എം.പി അബ്ദുല്ല, അടിയേരി രവീന്ദ്രന്‍, വി.പി ഇബ്രാഹിം, പി.എം നിസാര്‍ സംസാരിച്ചു. സൂപ്രണ്ടിങ് എന്‍ജിനീയര്‍ പി.കെ മിനി സ്വാഗതവും അസിസ്റ്റന്റ് എക്‌സിക്യൂട്ടീവ് എന്‍ജിനീയര്‍ ജി. ബാബു നന്ദിയും പറഞ്ഞു.