തിരൂര്‍: രുചിയൂറും പോഷകാഹാരങ്ങളുണ്ടാക്കി കഴിച്ചാല്‍ മാത്രം പോര. കാന്‍സര്‍ പോലുമുള്ള മാരക രോഗങ്ങള്‍ക്കെതിരേ കരുതലും ' വേണമെന്നാണ് നുസൈബയുടെ നിലപാട്. അതിനാലാണ് പത്തിന പോഷകാഹാരങ്ങളുണ്ടാക്കിയപ്പോള്‍ നുസൈബ ലക്ഷ്മി തരുവും മുള്ളന്‍ ചക്കയിലയും കൂടെ കൂട്ടിയത്. വെട്ടത്തൂര്‍ ജി.എച്ച്.എസ്.എസിലെ നുസൈബ 41 ഇല തോരന്‍, മിക്‌സഡ് ധാന്യ കുറുക്ക്, ചക്ക വാഴക്കന്ന് ഉപ്പേരി, അത്തിക്കായ തോരന്‍, ജീരക കഞ്ഞി, കൂണ്‍ കറി, ഈത്തപ്പഴ പൂക്കുല ലേഹ്യം, കപ്പ പായസം, സ്‌പെഷല്‍ അവിയല്‍, ധാന്യങ്ങള്‍ മുളപ്പിച്ചത് എന്നിങ്ങനെ പത്ത് വിധം പോഷകാഹാരങ്ങളാണ് ജില്ലാ ശാസ്‌ത്രോത്സവത്തിലെ ഹയര്‍ സെക്കന്ററി തത്സമയ പോഷകാഹാര നിര്‍മാണ മത്സരത്തില്‍ തയാറാക്കിയത്. ഇതിന് പുറമെയാണ് വിഭവങ്ങള്‍ക്കൊപ്പം ലക്ഷ്മി തരുവും മുള്ളന്‍ ചക്കയിലയും ചേര്‍ത്തുവച്ചത്. കാന്‍സര്‍ ഉള്‍പ്പെടെയുള്ള രോഗങ്ങള്‍ക്കെതിരേ ആകര്‍ഷകമാം വിധം ബോധവത്ക്കരണ 'പോസ്റ്ററുകളും പ്രദര്‍ശിപ്പിച്ചിരുന്നു. കഴിഞ്ഞ വര്‍ഷം 80 പോഷകാഹാര വിഭവങ്ങളുമായാണ് സ്ത്രസെബ മത്സരിച്ചത്. ഇത്തവണ തയാറാക്കേണ്ട വിഭവങ്ങളുടെ എണ്ണം പരിമിതപ്പെടുത്തിയതിനാല്‍ പത്തെണ്ണത്തിലേക്ക് ചുരുക്കുകയായിരുന്നു.