കൊണ്ടോട്ടി: ലൈഫ് മിഷന്‍ ഭവന പദ്ധതിവഴി ഭൂമിയും വീടുമില്ലാത്ത സംസ്ഥാനത്തെ മൂന്നര ലക്ഷം കുടുംബങ്ങള്‍ക്ക് ഫ്‌ളാറ്റ് നിര്‍മിച്ചു നല്‍കുന്നതിന് സ്ഥലം ഏറ്റെടുക്കുന്നതിനായി തദ്ദേശ സ്ഥാപനങ്ങള്‍ക്ക് മാനദണ്ഡങ്ങളും കര്‍ശന നിര്‍ദേശങ്ങളും.ഗുണഭോക്താക്കള്‍ക്ക് പ്രയോജനപ്പെടുത്താന്‍ സാധിക്കാത്ത സ്ഥലങ്ങള്‍ കണ്ടെത്തി സര്‍ക്കാര്‍ സ്ഥാപനങ്ങള്‍ പണിയുന്നത് തടയുന്നതിന്റെ മുന്നോടിയായാണ് സര്‍ക്കാര്‍ കര്‍ശന മാനദണ്ഡങ്ങള്‍ പുറപ്പെടുവിച്ചത്. കുടുംബങ്ങളെ പാര്‍പ്പിക്കാനുള്ള ഫ്‌ളാറ്റുകള്‍ നിര്‍മിക്കുന്ന സ്ഥലം ചുരുങ്ങിയത് 50 സെന്റ് ഭൂമി വേണമെന്നാണ് പ്രധാന നിബന്ധന. ഏറ്റെടുക്കുന്ന ഭൂമി തണ്ണീര്‍ത്തട സംരക്ഷണ നിയമത്തിന്റെ പരിധിയില്‍ വരുന്നതോ, വനഭൂമിയോ ആവാന്‍ പാടില്ല. ഈ സ്ഥലം കെ.എം.ബി.ആര്‍, കെ.പി.ബി.ആര്‍ പ്രകാരം നിര്‍ദിഷ്ടമുള്ള ഭൂമിയും, ഇവിടേക്ക് ആവശ്യമായ റോഡും ഉണ്ടായിരിക്കണം. അഗ്നിശമന പ്രവര്‍ത്തനങ്ങള്‍ നടത്താന്‍ വേണ്ട വീതി ഉറപ്പുവരുത്തണം. കുടിവെള്ളത്തിനും നിര്‍മാണ പ്രവര്‍ത്തികള്‍ക്കുമുള്ള ജലം തുടര്‍ച്ചയായി ലഭ്യമാക്കുമെന്ന് ഉറപ്പ് വരുത്താന്‍ കഴിയണം.അഞ്ച് കി.മീ പരിധിയില്‍ സ്‌കൂള്‍,ആശുപത്രി എന്നിവ ഉണ്ടായിരിക്കണമെന്നും നിര്‍ദേശിച്ചിട്ടുണ്ട്.

ഭൂമിയില്‍ അംഗീകരിച്ചതോ അംഗീകരിക്കാന്‍ ഉള്ളതോ ആയ മാസ്റ്റര്‍ പ്ലാനുകള്‍, റോഡ് വീതികൂട്ടല്‍ എന്നിവയെ തുടര്‍ന്നുള്ള തടസങ്ങള്‍ ഉണ്ടാവാന്‍ പാടില്ല. ഫ്‌ളാറ്റില്‍ നിര്‍മിക്കുന്ന സെപ്റ്റിക് ടാങ്ക്, മലിനജലം എന്നിവ വഴി പൊതുജന പരാതികള്‍ ഇല്ലാത്ത ഇടമായിരിക്കണം.ഒറ്റപ്പെട്ട സ്ഥലമോ, വന്യമൃഗ ശല്യമുളള ഭൂമിയോ ആവാന്‍ പാടില്ല. ഏറ്റെടുക്കുന്ന ഭൂമി ഭവന സമുച്ഛയത്തിന് യോഗ്യമാണോ എന്ന് ജില്ലാ ടൗണ്‍ പ്ലാനര്‍, എക്‌സിക്യൂട്ടീവ് എന്‍ജിനീയര്‍, തദ്ദേശ സ്വയംഭരണ സ്ഥാപനത്തിന്റെ എന്‍ജിനീയര്‍, സെക്രട്ടറി, ലൈഫ് മിഷന്‍ ജില്ലാതല എന്‍ജിനീയര്‍,കോഡിനേറ്റര്‍ എന്നിവരടങ്ങുന്ന സമിതി പരിശോധിച്ച് അംഗീകരിക്കണം.
ലൈഫ് മിഷന്‍ ഗുണഭോക്താക്കളായി സംസ്ഥാനത്ത് ഭൂരഹിത-ഭവനരഹിതരായവരുടെ എണ്ണം മൂന്നര ലക്ഷമാണ്. ജനറല്‍ വിഭാഗത്തില്‍ 2,84,655 പേരും,എസ്.ടി വിഭാഗത്തില്‍ 8150 പേരും,എസ്.ഇ വിഭാഗത്തില്‍ 57,242 പേരും ഉള്‍പ്പെടെ 3,50,047 ഗുണഭോക്താക്കളാണ് സംസ്ഥാനത്ത് ഉള്ളത്. ഇവരില്‍ 57,653 പേരും തിരുവനന്തപുരം ജില്ലക്കാരാണ്. ഏറ്റവും കുറവുള്ള വയനാട്ടില്‍ 7840 പേരാണുള്ളത്. കിടപ്പാടവും,വീടുമില്ലാത്ത 13,443 ഗുണഭോക്താക്കള്‍ മത്സ്യത്തൊഴിലാളികളാണ്. ഇവരില്‍ ജനറല്‍ വിഭാഗത്തില്‍ 12,870 പേരുണ്ട്. എസ്.ഇ വിഭാഗത്തില്‍ 87 പേരും, എസ്.ടി വിഭാഗത്തില്‍ 87 പേര്‍ക്കും അവസരമുണ്ട്. തോട്ടം തൊഴിലാളികളായി 7963 ഗുണഭോക്താക്കളാണുള്ളത്.ഇവരില്‍ ജനറല്‍ വിഭാഗത്തില്‍ 3863 പേരും,എസ്.ഇ വിഭാഗത്തില്‍ 3385 പേരും,എസ്.ടി വിഭാഗത്തില്‍ 715 പേരുമാണുള്ളത്. തോട്ടം തൊഴിലാളികള്‍ കൂടുതലുളള ഇടുക്കിയില്‍ 4633 ഗുണഭോക്താക്കളാണുള്ളത്. ഏറ്റവും കുറവുളള കണ്ണൂരില്‍ 14 പേരുമാണ് ഗുണഭോക്താക്കളുടെ ലിസ്റ്റില്‍ ഇടം പിടിച്ചത്.