കിളിമാനൂര്‍ (തിരുവനന്തപുരം): നിര്‍ത്താന്‍ കൈ കാണിക്കുന്നതിനിടയില്‍ സബ് ഇന്‍സ്‌പെക്ടറെ ഇടിച്ച് തെറിപ്പിച്ച് ആംബുലന്‍സ് ഓടിച്ചു പോയി. ഗുരുതരമായി പരുക്കേറ്റ സബ് ഇന്‍സ്‌പെക്ടറെ തിരുവനന്തപുരത്തെ സ്വകാര്യ ആശുപത്രിയിലെ തീവ്ര പരിചരണ വിഭാഗത്തില്‍ പ്രവേശിപ്പിച്ചു.

കിളിമാനൂര്‍ പൊലിസ് സ്റ്റേഷനിലെ സബ് ഇന്‍സ്‌പെക്ടര്‍ ബൈജുവിനെയാണ് ആംബുലന്‍സ് ഇടിച്ചത്. ആബുലന്‍സ് ഡ്രൈവര്‍ ഗോപകുമാറിനെയും ആംബുലന്‍സും പൊലിസ് കസ്റ്റഡിയില്‍ എടുത്തു.

ശനിയാഴ്ച രാത്രി 9.30 മണിയോടെ കിളിമാനൂര്‍ ജംഗ്ഷനിലാണ് സംഭവം. തിരുവനന്തപുരത്ത് നിന്നു പുനലൂരിലേക്ക് വരികയായിരുന്നു ആംബുലന്‍സ്. വഴിയില്‍ പലയിടത്തും വാഹനങ്ങളിലും മറ്റും ഇടിച്ച് അമിത വേഗതയില്‍ വരികയായിരുന്നു ഈ ആംബുലനസ്.

പുനലൂര്‍ താലൂക്ക് ഹെഡ് കോര്‍ട്ടേഴ്‌സ് ആശുപത്രിയിലെ ആംബുലന്‍സാണ്. ആബുലന്‍സ് അപകടം ഉണ്ടാക്കി വരുന്ന വിവരം അറിഞ്ഞാണ് എസ്.ഐ വാഹനത്തിന് കൈ കാണിച്ചത്. നിര്‍ത്താതെ സബ് ഇന്‍സ്‌പെക്ടറെ ഇടിച്ച് തെറിപ്പിച്ച് റൂട്ട് മാറ്റി ആറ്റിങ്ങല്‍ ഭാഗത്തേക്ക് ഓടിച്ചു പോവുകയായിരുന്നു. പൊലിസ് പിന്തുടര്‍ന്ന് പിടികൂടുകയായിരുന്നു.