കൊച്ചി: കെ.എസ്.ആര്‍.ടി.സിയില്‍ മൂന്നുമാസമായി പെന്‍ഷന്‍ ലഭിക്കുന്നില്ലെന്നും നടപടി വേണമെന്നുമാവശ്യപ്പെട്ട് സമര്‍പ്പിച്ച ഹരജിയില്‍ ഹൈക്കോടതി സര്‍ക്കാരിന്റെയും കോര്‍പ്പറേഷന്റെയും വിശദീകരണം തേടി. കഴിഞ്ഞ മൂന്ന് മാസമായി പെന്‍ഷന്‍ ലഭിക്കുന്നില്ലെന്നും ഇതിന് മുന്‍പ് ജൂണ്‍, സെപ്റ്റംബര്‍ മാസങ്ങളില്‍ ഭാഗികമായാണ് ലഭിച്ചതെന്നും കെ.എസ്.ആര്‍.ടി.സി പെന്‍ഷനേഴ്‌സ് ഓര്‍ഗനൈസേഷന്‍ ഭാരവാഹികള്‍ നല്‍കിയ ഹരജിയില്‍ പറയുന്നു.
2007 വരെ ജീവനക്കാര്‍ക്ക് ശമ്പളം നല്‍കുന്നതിനൊപ്പം വിരമിച്ചവര്‍ക്ക് പെന്‍ഷനും നല്‍കിയിരുന്നു. എല്ലാ മാസവും ആദ്യം തന്നെ പെന്‍ഷന്‍ നല്‍കണമെന്ന് കേരള സര്‍വിസ് റൂളില്‍ പറയുന്നുണ്ടെന്നും സുപ്രിം കോടതി ഇക്കാര്യം പറഞ്ഞിട്ടുണ്ടെന്നും ഹരജിയില്‍ പറയുന്നു. സര്‍ക്കാര്‍ മതിയായ സാമ്പത്തിക സഹായം നല്‍കാത്തതാണ് പ്രശ്‌നങ്ങള്‍ക്ക് കാരണം. പെന്‍ഷനടക്കമുള്ള ബാധ്യതകള്‍ സര്‍ക്കാര്‍ ഏറ്റെടുക്കണമെന്ന നിയമസഭാ സമിതിയുടെ ശുപാര്‍ശ സര്‍ക്കാര്‍ പരിഗണിക്കാന്‍ തയാറാകുന്നില്ലെന്നും ഹരജിയില്‍ പറയുന്നു. രണ്ടാഴ്ചയ്ക്കകം വിശദീകരണം നല്‍കാനാണ് ഹൈക്കോടതി നിര്‍ദേശം.