ദോഹ: 2018-2019 അധ്യയന വര്‍ഷത്തിനു മുന്നോടിയായി ഖത്തര്‍ വിദ്യാഭ്യാസ മന്ത്രാലയം 800 അധ്യാപകരെയും സ്‌കൂള്‍ ഭരണനിര്‍വഹണ ഉദ്യോഗസ്ഥരെയും റിക്രൂട്ട് ചെയ്യുന്നു. മന്ത്രാലയത്തിലെ ഹ്യുമന്‍ റിസോഴ്‌സ് വകുപ്പ് ഡയറക്ടര്‍ അലി അല്‍മറാഗിയാണ് ഇക്കാര്യം അറിയിച്ചത്.
വിദ്യാഭ്യാസത്തിന്റെ ഗുണനിലവാരം മെച്ചപ്പെടുത്തുകയാണ് റിക്രൂട്ട്‌മെന്റിലൂടെ ലക്ഷ്യമിടുന്നത്. 60 വയസ് പ്രായമായ അധ്യാപകരെയും പ്രൊഫഷനല്‍ പ്രകടനത്തിന് ആവശ്യമായ മാനദണ്ഡങ്ങള്‍ പൂര്‍ത്തിയാക്കാത്ത അധ്യാപകരെയും സ്‌കൂള്‍ ജീവനക്കാരെയും കുറിച്ചുള്ള വിവരങ്ങളുടെ അടിസ്ഥാനത്തില്‍ അടുത്ത അധ്യയനവര്‍ഷത്തേക്കായി പുതിയ മാനദണ്ഡങ്ങള്‍ നിര്‍ണയിക്കുകയും ചെയ്തിട്ടുണ്ട്. ഈ മാനദണ്ഡങ്ങള്‍ക്കു പുറത്തുള്ള അധ്യാപകരെയും ജീവനക്കാരെയും ഒഴിവാക്കും.
തുടര്‍ന്ന് ഒഴിവ് വരുന്ന തസ്തികകളിലേക്കു മന്ത്രാലയത്തിന്റെ റിക്രൂട്ട്‌മെന്റ് വെബ്‌സൈറ്റായ തൗതീഫ് മുഖേന അപേക്ഷകള്‍ ക്ഷണിക്കും.ഈമാസം 15 മുതല്‍ 31 വരെ ഇതിലേക്ക് എല്ലാ രാജ്യക്കാര്‍ക്കും അപേക്ഷിക്കാം. അപേക്ഷകള്‍ വിശദമായി പരിശോധിച്ചു വിലയിരുത്തിയ ശേഷം യോഗ്യരായവരെ തിരഞ്ഞെടുത്ത് അഭിമുഖത്തിനു ക്ഷണിക്കും. ഇതിനായി റിക്രൂട്ട്‌മെന്റ് വെബ്‌സൈറ്റ് നവീകരിച്ചിട്ടുണ്ട്. കൂടുതല്‍ ആശയവിനിമയ രൂപത്തിലും ഉപഭോക്തൃ സൗഹൃദമായുമാണ് സൈറ്റ് നവീകരിച്ചിരിക്കുന്നത്.നിലവില്‍ 56 രാജ്യങ്ങളില്‍നിന്നുള്ള അധ്യാപകര്‍ ഖത്തറില്‍ ജോലി ചെയ്യുന്നുണ്ട്.