ഒട്ടാവ: അന്താരാഷ്ട്ര കുത്തക മരുന്നു നിര്‍മാതാക്കളായ അപൊടെക്‌സ് ചെയര്‍മാനും കനേഡിയന്‍ ശതകോടീശ്വരനുമായ ബാരി ഷെര്‍മന്റെയും ഭാര്യയുടെയും ദുരൂഹമരണം വിദഗ്ധ സംഘം അന്വേഷിക്കും. ടൊറന്റോ പൊലിസിനു കീഴിലുള്ള പ്രത്യേക സംഘത്തിനാണ് ദമ്പതികളുടെ മരണത്തെക്കുറിച്ചുള്ള അന്വേഷണ ചുമതല.
കഴിഞ്ഞ ശനിയാഴ്ചയാണ് 75കാരനായ ഷെര്‍മനും ഭാര്യ ഹണിയും ടൊറന്റോയിലെ ഇവരുടെ എസ്റ്റേറ്റിലെ വീട്ടില്‍ ദുരൂഹസാഹചര്യത്തില്‍ മരിച്ച നിലയില്‍ കണ്ടത്. കെട്ടിടവും ഇവിടത്തെ വസ്തുവകകളും വില്‍പന നടത്താന്‍ നേതൃത്വം നല്‍കുന്ന ഏജന്റാണ് ദമ്പതികളെ മരിച്ച നിലയില്‍ കണ്ടെത്തിയതും പൊലിസില്‍ വിവരമറിയിച്ചതും. കഴുത്തു ഞെരിച്ചോ ശ്വാസം മുട്ടിച്ചോ ആണ് മരണമെന്ന് പോസ്റ്റേ്‌മോര്‍ട്ടം റിപ്പോര്‍ട്ടില്‍ വ്യക്തമാക്കിയിരുന്നു. തുടര്‍ന്നാണ് സര്‍ക്കാര്‍ അന്വേഷണത്തിനായി വിദഗ്ധ സമിതിയെ ഏല്‍പിച്ചത്.
ലോകവ്യാപകമായി ജനറിക് മരുന്നുകള്‍ വില്‍ക്കുന്ന ഫാര്‍മസി ഭീമന്മാരാണ് അപൊടെക്‌സ്. 1974ലാണ് ബാരി ഷെര്‍മന്‍ അപൊടെക്‌സ് കമ്പനി ആരംഭിച്ചത്. നിലവില്‍ ലോകത്തെ ഏഴാമത്തെ വലിയ മരുന്നു നിര്‍മാതാക്കളാണ് കമ്പനി. ഷെര്‍മന്‍-ഹണി ദമ്പതികള്‍ക്ക് നാലു മക്കളുണ്ട്.