ഇംഫാല്‍: ഇന്ത്യാ മ്യാന്‍മര്‍ അതിര്‍ത്തിയായ മൊറെയില്‍ സായുധസംഘങ്ങളുമായുണ്ടായ രൂക്ഷമായ ഏറ്റുമുട്ടലില്‍ ഇന്ത്യന്‍ റിസര്‍വ്വ് ബറ്റാലിയനിലെ രണ്ട് സൈനികര്‍ കൊല്ലപ്പെട്ടു. നാല് പോലിസുകാരെ ഗുരുതര പരിക്കുകളോടെ ആശുപത്രിയില്‍ പ്രവേശിപ്പിച്ചു. രണ്ട് ദിവസം മുമ്പ് കുക്കി ഇന്‍പി സംഘടനാ നേതാക്കളെ കാംഗ്‌പോക്പിയില്‍ വച്ച് മണിപ്പൂര്‍ പോലിസ് അറസ്റ്റ് ചെയ്തിരുന്നു. ഇതില്‍ പ്രതിഷേധിച്ച് കുക്കി മേഖലകളില്‍ സര്‍ക്കാര്‍ വിരുദ്ധ പ്രതിഷേധപരിപാടികള്‍ നടന്നുവരുന്നതിനിടെയാണ് പുതിയ സംഭവം. 24 മണിക്കൂറിനകം നേതാക്കളെ വിട്ടയച്ചില്ലെങ്കില്‍ പ്രത്യാഘാതം ഉണ്ടാകുമെന്ന് കുക്കികള്‍ മുന്നറയിപ്പ് നല്‍കിയിട്ടുണ്ട്.

ഇതേ തുടര്‍ന്ന് സംസ്ഥാനത്തിന്റെ വിവിധ ഭാഗങ്ങളില്‍ പൊലിസും കുക്കികളും ഏറ്റുമുട്ടലുകളുണ്ടായി. സംഘര്‍ഷം ഇപ്പോഴും തുടരുന്ന രാജ്യാതിര്‍ത്തിയില്‍ വ്യാപകമായ വെടിവെപ്പും തുടരുകയാണ്. ഇവിടെ വിവിധ സൈനിക ഗ്രൂപ്പുകളായ ആസ്റ്റാം റൈഫിള്‍സ്, ഖൂര്‍ഖാ റജിമെന്റ്, ബി.എസ്.എഫ്, സ്‌പെഷല്‍ കമാണ്ടോ വിങ്, മൊറെ കമാണ്ടോസ്, ഇന്ത്യന്‍ റിസര്‍വ്വ് ബറ്റാലിയന്‍, മണിപ്പൂര്‍ റൈഫിള്‍സ് എന്നിവയിലെ നൂറ് കണക്കിന് സൈനികരെയാണ് വിന്യസിച്ചിരിക്കുന്നത്. ഇതിനിടയിലാണ് ഉയരം കൂടിയ കുന്നുകളില്‍ നിന്ന് ലോക്കറ്റ് ലോഞ്ചറുകള്‍ ഉപയോഗിച്ച് സായുധസംഘങ്ങള്‍ സൈന്യത്തിന് നേരെ ആക്രമണം നടത്തുന്നത്. ഇവിടെ സമാധാനം തിരിച്ച് കൊണ്ടുവരാന്‍ തീവ്ര മെയ്തി വിഭാഗങ്ങളുടെ ഇടപെടല്‍ അവസാനിപ്പിക്കണമെന്ന് കുക്കി ഇന്‍പി സംഘടനാ നേതാക്കള്‍ പറഞ്ഞു. മെയ്തികളിലെ തീവ്രവാദ ഗ്രൂപ്പുകളായ ആറംബായ് തെങ്കാള്‍ മെയ്തിലീപൂണ്‍ എന്നിവരാണ് ഇപ്പോള്‍ നടക്കുന്ന സംഘര്‍ഷങ്ങള്‍ക്ക് പിന്നിലെന്ന് ഇവര്‍ പറഞ്ഞു. ഏറ്റുമുട്ടല്‍ രൂക്ഷമായ മൊറെയില്‍ സ്ഥിതി ഗുരുതരമായി തുടരുന്നതായി പോലീസ് പറഞ്ഞു. ഉയര്‍ന്ന ഉദ്യോഗസ്ഥര്‍ സ്ഥലത്ത് ഉണ്ടെങ്കിലും വിവിധ സ്ത്രീ സംഘടനകള്‍ രംഗത്തിറങ്ങിയത് സര്‍ക്കാറിനെ ആശങ്കയിലാക്കിയിട്ടുണ്ട്.