പങ്കാളിത്ത പെന്‍ഷനു പകരം പുതിയ പദ്ധതി; ഏപ്രിലില്‍ ഒരു ഗഡു ഡി.എ

തിരുവനന്തപുരം: പങ്കാളിത്ത പെന്‍ഷന്‍ പദ്ധതിക്കു പകരം സംസ്ഥാനത്ത് ഒരു അഷ്വേര്‍ഡ് പെന്‍ഷന്‍ സമ്പ്രദായം നടപ്പാക്കുമെന്ന് ധനമന്ത്രി കെ.എന്‍ ബാലഗോപാല്‍. പങ്കാളിത്ത പെന്‍ഷന്‍ പദ്ധതി സൃഷ്ടിച്ച അരക്ഷിതത്വം സര്‍ക്കാര്‍ ജീവനക്കാരില്‍ വലിയ ആശങ്കയ്ക്ക് വഴിവച്ചിട്ടുണ്ടെന്ന് ധനമന്ത്രി ബജറ്റ് പ്രസംഗത്തില്‍ പറഞ്ഞു.

പദ്ധതി പുനഃപരിശോധിക്കുന്നത് സംബന്ധിച്ച് പഠിക്കാന്‍ സര്‍ക്കാര്‍ നിയോഗിച്ച കമ്മിറ്റിയുടെ റിപ്പോര്‍ട്ടിന്റെ തുടര്‍ പരിശോധനയ്ക്കായി മൂന്നംഗ സമിതി രൂപവത്കരിച്ചിട്ടുണ്ട്. കേന്ദ്രസര്‍ക്കാരിന് നല്‍കിയ വിഹിതം തിരികെ ലഭിക്കാന്‍ ആവശ്യമായ നടപടി സ്വീകരിക്കും. മറ്റു സംസ്ഥാനങ്ങളിലെ പുതിയ പദ്ധതികള്‍ കൂടി പഠിച്ച് സംസ്ഥാനത്ത് നടപ്പിലാക്കാന്‍ ആവശ്യമായ നടപടികള്‍ സ്വീകരിക്കുമെന്നും മന്ത്രി പറഞ്ഞു.

സര്‍ക്കാര്‍ ജീവനക്കാര്‍ക്ക് ഏപ്രില്‍ മാസത്തെ ശമ്പളത്തോടൊപ്പം ഒരു ഗഡു ഡി.എ നല്‍കുമെന്നും ധനമന്ത്രി ബജറ്റില്‍ പ്രഖ്യാപിച്ചു. പെന്‍ഷന്‍കാരുടെയും ഒരു മാസത്തെ ഗഡു നല്‍കും. നിലവില്‍ ആറു മാസത്തെ ഡിഎയാണ് കുടിശികയുള്ളത്. സര്‍ക്കാര്‍ ജീവനക്കാര്‍ കോവിഡ് കാലഘട്ടത്തില്‍ പെന്‍ഷന്‍ പരിഷ്‌കരണം നടപ്പാക്കിയ ഏക സംസ്ഥാനമാണ് കേരളമെന്നും കേന്ദ്രം കേരളത്തിനര്‍ഹതപ്പെട്ട 57,00 കോടി രൂപ വെട്ടിക്കുറച്ചതിനിടെയാണ് കുടിശിക വിതരണം ചെയ്യാന്‍ തീരുമാനിച്ചതെന്നും ധനമന്ത്രി പറഞ്ഞു.