206,396 വിമാനങ്ങളിൽ നിന്നും 46,870,957 ബാഗുകൾ കൈകാര്യം ചെയ്തു.

ദുബൈ: 2023ൽ 17.15 മില്യൺ അന്താരാഷ്ട്ര സന്ദർശകരുടെ പുതിയ റെക്കോർഡിട്ട് ദുബൈ കസ്റ്റംസ്. 206,396 വിമാനങ്ങളിൽ നിന്നും 46,870,957 ബാഗുകളാണ് കഴിഞ്ഞ വർഷം ദുബൈ കസ്റ്റംസ് കൈകാര്യം ചെയ്തത്. പ്രതിദിനം ശരാശരി 128,400 ബാഗുകൾ. യാത്രക്കാരുടെ സംതൃപ്തി ഉറപ്പാക്കുന്നതിലും അവരുടെ അനുഭവം മെച്ചപ്പെടുത്തുന്നതിലും കസ്റ്റംസ് ശ്രദ്ധ കേന്ദ്രീകരിക്കുന്നുവെന്ന് അധികൃതർ പറഞ്ഞു. പാസഞ്ചർ ഓപറേഷൻസ് ഡിപാർട്ട്‌മെൻ്റിൽ 77 ബാഗേജ് പരിശോധനാ ഉപകരണങ്ങളുടെ പിന്തുണയുള്ള 845-ലധികം ഇൻസ്പെക്ഷൻ ഓഫീസർമാരുണ്ട്.
2023ൽ 17.15 ദശലക്ഷം അന്താരാഷ്ട്ര സന്ദർശകരുടെ റെക്കോർഡ് ഭേദിച്ചതിൽ ദുബൈ കസ്റ്റംസ് നിർണായക പങ്കാണ് വഹിച്ചിട്ടുള്ളത്. സഞ്ചാരികളെ നന്നായി സ്വീകരിക്കാനും സേവനങ്ങൾ മെച്ചപ്പെടുത്താനും വിനോദ സഞ്ചാരത്തിനും ബിസിനസിനുമുള്ള ആഗോള കേന്ദ്രമെന്ന നിലയിൽ യുഎഇയുടെ, പ്രത്യേകിച്ചും ദുബൈയുടെ അത്യാധുനിക ഇമേജ് പ്രദർശിപ്പിക്കാനും ഈ വകുപ്പ് പ്രതിജ്ഞാബദ്ധമാണ്.
ദുബൈ വിമാനത്താവളങ്ങളിലെത്തുന്ന യാത്രക്കാരുടെ സംതൃപ്തി ഉറപ്പാക്കുന്നതിലും അവരുടെ കസ്റ്റംസ് നടപടിക്രമങ്ങൾ കാര്യക്ഷമമാക്കുന്നതിലും വകുപ്പ് വഹിക്കുന്ന പ്രധാന പങ്ക് കസ്റ്റംസിലെ പാസഞ്ചർ ഓപറേഷൻസ് ഡയറക്ടർ ഇബ്രാഹിം അൽ കമാലി ഊന്നിപ്പറഞ്ഞു.
കസ്റ്റംസ് പരിശോധനാ മേഖലയിലെ വിപുലമായ പദ്ധതിയുടെ ഭാഗമായി, ആർട്ടിഫിഷ്യൽ ഇൻ്റലിജൻസ് അടക്കമുള്ള സാങ്കേതിക വിദ്യകൾ പ്രയോജനപ്പെടുത്തി യാത്രക്കാർക്കായി അത്യാധുനിക സംവിധാനങ്ങൾ നടപ്പാക്കാൻ വകുപ്പ് പ്രതിജ്ഞാബദ്ധമാണ്.
ഈയിടെ അവതരിപ്പിച്ച 'ഐ ഡിക്ലയർ' എല്ലാ സ്‌മാർട്ട് ഉപകരണങ്ങൾക്കും യോജിച്ച ആപ്പാണ്. എത്തിച്ചേരുന്ന യാത്രക്കാരെ അവരുടെ ലഗേജുകളും വ്യക്തിഗത വസ്‌തുക്കളും യഥാർത്ഥ സ്ഥലത്ത് എത്തുന്നതിന് മുൻപ് വെളിപ്പെടുത്താൻ അനുവദിക്കുന്നതാണിത്. ഇത് റെഡ് ചാനലിലൂടെയുള്ള കസ്റ്റംസ് പ്രോസസ്സിംഗ് സമയം 4 മിനിറ്റിൽ താഴെയായി കുറയ്ക്കുന്നു.