തീ വര്‍ഷിക്കുന്ന ആകാശത്തിന് കീഴെ സയണിസ്റ്റ് ടാങ്കുകള്‍ക്ക് മുന്നില്‍ തല ഉയര്‍ത്തി നിന്ന് ഗസ്സയിലെ 11കാരി റിപ്പോര്‍ട്ടര്‍ പറയുന്നു 'എനിക്ക് ഭയമില്ല'

നൂറിലേറെ മാധ്യമ പ്രവര്‍ത്തകര്‍ കൊല്ലപ്പെട്ട, മാധ്യമ പ്രവര്‍ത്തകരെ ലക്ഷ്യമിട്ടുള്ള ആക്രമണങ്ങള്‍ ഇപ്പോഴും തുടരുന്ന ഗസ്സയുടെ മണ്ണില്‍ ഉറച്ചു നിന്ന് 11കാരിയായ റിപ്പോര്‍ട്ടര്‍ പറയുന്നു.'എനിക്ക് ഭയമില്ല'. ഇസ്‌റാഈല്‍ ഭീകരരേ നിങ്ങള്‍ വര്‍ഷിക്കുന്ന തീമഴകളേയും ബോംബുകളേയും തലക്കു മീതെ പറത്തിക്കുന്ന യുദ്ധ വിമാനങ്ങളേയും ഞങ്ങള്‍ക്കു നേരെ കാണാമറയത്തു നിങ്ങള്‍ ചൂണ്ടുന്ന തോക്കിന്‍ മ ുനകളേയും യുദ്ധ ടാങ്കുകളേയും എനിക്ക് ഭയമില്ല. ഇത് സുമയ്യ വുഹാഷ്. ഗസ്സയില്‍ നിന്നുള്ള 11കാരി റിപ്പോര്‍ട്ടര്‍.

'എന്റെ ഉമ്മാക്കും ഉപ്പാക്കും എന്നെ കുറിച്ച് ആശങ്കയായിരുന്നു. പ്രത്യേകിച്ചും മാധ്യമപ്രവര്‍ത്തകര്‍ ടാര്‍ഗറ്റ് ചെയ്യപ്പെടുന്ന യുദ്ധ ഭൂമികയിലേക്കാണല്ലോ റിപ്പോര്‍ട്ടിങ്ങിനായി ഞാനിറങ്ങുന്നത്. എന്നാല്‍ ഈ മേഖലയില്‍ തുടരാനുള്ള എന്റെ ഉറച്ച തീരുമാനം കണ്ടപ്പോള്‍ അവര്‍ അനുവാദം നല്‍കുകയായിരുന്നു' മുതിര്‍ന്നവരെ പോലെ കുഞ്ഞു സുമയ്യ പറയുന്നു. അല്‍ജസീറയോടായിരുന്നു സുമയ്യയുടെ പ്രതികരണം.

ഇസ്‌റാഈല്‍ കൊലപ്പെടുത്തിയ അല്‍ ജസീറയുടെ റിപ്പോര്‍ട്ടര്‍ ഷിറീന്‍ അബൂ അഖ്‌ലേയാണ് തന്റെ പ്രചോദനമെന്നും അവള്‍ പറയുന്നു.

' ഈയുദ്ധം തുടങ്ങുന്നതിന് മുമ്പുതന്നെ മാധ്യമപ്രവര്‍ത്തകയാവാന്‍ ആഗ്രഹിച്ചയാളാണ് ഞാന്‍. ലോകത്തിന് മുന്നില്‍ എനിക്ക് സ്വന്തം തെളിയിക്കാന്‍ കഴിയുന്ന ഒരു മാധ്യമപ്രവര്‍ത്തകയാവണം എന്നായിരുന്നു ആഗ്രഹം. ഷിറീന്‍ അബൂ അഖ്‌ലേയായിരുന്നു എന്‍രെ റോള്‍മോഡല്‍.അവരെപ്പോലെ എനിക്കും എന്റെ കഴിവ് തെളിയിക്കണമായിരുന്നു' കുഞ്ഞു സുമയ്യ പറയുന്നു.

ദൈവത്തില്‍ ഭരമേല്‍പിക്കുന്നു എന്ന് ഉപ്പയോടും ഉമ്മയോടും പറഞ്ഞാണ് പുറത്ത് പോവുന്നത്. ഇസ്‌റാഈല്‍ ടാര്‍ഗറ്റ് ചെയ്യുന്നവരില്‍ ഞാനുമുണ്ടോ എന്ന് എനിക്കറിയില്ലല്ലോ. റിപ്പോര്‍ട്ടിങ്ങിന്റെ വഴിയിലോ മടങ്ങുമ്പോഴോ ഷൂട്ട് ചെയ്യുമ്പോഴോ എപ്പോഴാണ് ഞാന്‍ അവരുടെ ഇരയാവുകയെന്നും പറയാനാവില്ല' ഷിറീന്‍ അബൂ അഖ്‌ലേയെ പോലെ ഒട്ടും ഭയമില്ലാതെ ഇരുത്തം വന്ന മാധ്യമപ്രവര്‍ത്തകയുടെ പക്വതയോടെ ആ പതിനൊന്നുകാരി പറഞ്ഞു നിര്‍ത്തുന്നു.

Meet Gaza’s 11-year-old war reporter Sumayya Wushah, who says she was inspired by Shireen Abu Akleh to tell Palestine’s stories. pic.twitter.com/a7vB99nkqa

— Al Jazeera English (@AJEnglish) February 27, 2024

2022 മെയിലാണ് 'അല്‍ ജസീറ' ചാനല്‍ റിപ്പോര്‍ട്ടറും ഫലസ്തീനിയുമായ ഷിറീന്‍ അബൂ അഖ്‌ലേയെ ഇസ്‌റാഈല്‍ കൊലപ്പെടുത്തുന്നത്. വളരെ അടുത്തുനിന്ന് മുഖത്തേക്ക് വെടിയുതിര്‍ത്താണ് ഇസ്‌റാഈല്‍ സൈനികര്‍ 51കാരിയായ പ്രമുഖ മാധ്യമ പ്രവര്‍ത്തകയെ കൊലപ്പെടുത്തിയത്. ജനീന്‍ അഭയാര്‍ഥി ക്യാംപില്‍ ഇസ്‌റാഈല്‍ നടത്തുന്ന ആക്രണം റിപ്പോര്‍ട്ട് ചെയ്യാനായി പോയതായിരുന്നു അവര്‍.

അതേസമയം വെടിനിര്‍ത്തല്‍ ചര്‍ച്ചകള്‍ തകൃതിയായി പുരോഗമിക്കുമ്പോഴും ഇസ്‌റാഈല്‍ ആക്രമണം ശക്തമായി തുടരുകയാണ്. ഗസ്സയില്‍ ഇതിനകം 29,878 ഫലസ്തീനികള്‍ കൊല്ലപ്പെട്ടതായി ആരോഗ്യ മന്ത്രാലയം ചൊവ്വാഴ്ച പത്രക്കുറിപ്പില്‍ പറയുന്നു. കഴിഞ്ഞ 24 മണിക്കൂറിനുള്ളില്‍ 96 ഫലസ്തീനികളെയാണ് ഇസ്‌റാഈല്‍ സൈന്യം കൊലപ്പെടുത്തിയത്. അവസാന അഭയകേന്ദ്രമായ റഫയിലും ശക്തമായ ആക്രമണമാണ് സയണിസ്റ്റുകള്‍ നടത്തുന്നത്. പട്ടിണിമൂലം അനുഭവിക്കുന്ന കഷ്ടതകള്‍ വേറെ. കഴിഞ്ഞ നാലുമാസമായി ലോകം ഇന്നോളം കണ്ടിട്ടില്ലാത്ത ദുരന്തങ്ങളിലൂടെയാണ് ഈ ജനത കടന്നു പോയിക്കൊണ്ടിരിക്കുന്നത്.