പട്‌ന: ഇന്ത്യ സ്‌നേഹത്തിന്റെ രാജ്യമാണെന്നും ഇവിടെ സ്‌നേഹത്തിന്റെ കട തുറക്കുമെന്നും ആവര്‍ത്തിച്ച് രാഹുല്‍ ഗാന്ധി. ബിഹാറിലെ പട്‌നയില്‍ ജനവിശ്വാസ് റാലിയില്‍ സംസാരിക്കുകയായിരുന്നു അദേഹം.പ്രധാനമന്ത്രി മോദിക്ക് നേരെയും അദേഹം ആഞ്ഞടിച്ചു.പ്രധാനമന്ത്രി നരേന്ദ്രമോദി രാജ്യത്തിന് വേണ്ടി ഒന്നും ചെയ്തിട്ടില്ല. കര്‍ഷകര്‍ക്കും യുവാക്കള്‍ക്കും വേണ്ടി ഒന്നും ചെയ്തിട്ടില്ല. രാജ്യത്ത് അനീതി നടക്കുകയാണ്. അത് മറക്കാന്‍ വേണ്ടിയാണ് വിദ്വേഷം പ്രചരിപ്പിക്കുന്നതെന്നും രാഹുല്‍ ഗാന്ധി പറഞ്ഞു. എല്ലാ മേഖലയും മോദി സര്‍ക്കാര്‍ തകര്‍ത്തു.

ബിഹാറില്‍ ആരംഭിച്ച ഈ കൊടുംകാറ്റ് രാജ്യത്താകമാനം ആഞ്ഞടിക്കും. ബിജെപിയെയും ആര്‍എസ്എസിനെയും പുറത്താക്കി സര്‍ക്കാര്‍ രൂപീകരിക്കുമെന്നും രാഹുല്‍ ഗാന്ധി പറഞ്ഞു.ഒരു നുണ ഫാക്ടറിയാണ് മോദിയെന്നായിരുന്നു ആര്‍ജെഡി നേതാവ് തേജസ്വി യാദവിന്റെ പരിഹാസം.മോദി കണ്ണട തുടച്ച് യാഥാര്‍ത്ഥ്യങ്ങള്‍ കാണാന്‍ ശ്രമിക്കണമെന്നും തേജസ്വി യാദവ് വിമര്‍ശിച്ചു.ഇന്‍ഡ്യ മുന്നണിയിലെ പ്രധാനപ്പെട്ട നേതാക്കള്‍ പങ്കെടുക്കുന്ന റാലി ഗാന്ധി മൈതാനത്താണ് നടക്കുന്നത്. ഇന്‍ഡ്യമുന്നണി രൂപീകരിച്ച ശേഷം സംഘടിപ്പിക്കുന്ന ആദ്യ പൊതു സമ്മേളനം ആണിത്. ആര്‍ജെഡി നേതാവ് തേജസ്വി യാദവ് നടത്തിയ യാത്രയുടെ സമാപന സമ്മേളനമാണ് പ്രതിപക്ഷനിരയുടെ ഐക്യവേദിയായി മാറിയത്.