തിരുവനന്തപുരം: സംസ്ഥാനത്ത് കൊവിഡ് പരിശോധനാ നിരക്ക് കുറച്ചു. ആര്‍.ടി.പി.സി.ആറിന് 1500 രൂപയാക്കി. ആന്റിജന്‍ ടെസ്റ്റിന് നിരക്ക് പകുതിയാക്കി കുറച്ചിട്ടുണ്ട്. 300 രൂപയാണ് നിലവിലെ ചാര്‍ജ്ജ്. നേരത്തെ ആര്‍.ടി.പി.സി.ആറിന് 2100ഉം ആന്റിജന് 625ഉം ആയിരുന്നു ചാര്‍ജ്ജ്.

അതിനിടെ കേരളത്തില്‍ നാല് ജില്ലകളില്‍ നാളെ കൊവിഡ് വാക്‌സിന്‍ ഡ്രൈ റണ്‍ നടക്കുകയാണ്. തിരുവനന്തപുരം, പാലക്കാട്, ഇടുക്കി, വയനാട് എന്നിവിടങ്ങളിലാണ് ഡ്രൈ റണ്‍ നടക്കുക. തിരുവനന്തപുരത്ത് മൂന്ന് ഇടങ്ങളിലും മറ്റ് ജില്ലകളില്‍ ഒരോ ഇടത്തുമാണ് ഡ്രൈ റണ്‍.

കൊവിഡ് വാക്‌സിന്‍ വിതരണം ആരംഭിക്കുന്നതിന് മുന്നോടിയായി രാജ്യത്ത് നാളെ നടക്കുന്ന ദേശീയ ഡ്രൈ റണ്ണിനായുള്ള ഒരുക്കങ്ങളും പൂര്‍ത്തിയായി. വാക്‌സിന്‍ കുത്തിവയ്പ്പിനായി പുറത്തിറക്കിയ മാര്‍ഗരേഖയില്‍ പഴുതുകള്‍ ഉണ്ടോ എന്ന് പരിശോധിക്കുന്നതിന്റെ ഭാഗമായാണ് ഡ്രൈ റണ്‍.

അതേസമയം കൊവിഡ് വാക്‌സിന് അനുമതി നല്‍കുന്നത് തീരുമാനിക്കുന്ന സമിതിയുടെ നിര്‍ണായക യോഗം ഇന്ന് വീണ്ടും യോഗം ചേരും. രാജ്യത്തിനുള്ളില്‍ ലഭ്യമായ പരീക്ഷണ ഫലങ്ങളുടെ വിശദമായ അവലോകനമാണ് പ്രധാന അജണ്ട.