ജനീവ: ഫലസ്തീനിലെ ആരോഗ്യപ്രവര്‍ത്തകര്‍ക്ക് കൊവിഡ് വാക്‌സിന്‍ ലഭ്യമാക്കണമെന്ന് ഇസ്‌റാഈലിനോട് നിര്‍ദേശിച്ച് ലോകാരോഗ്യ സംഘടന. എന്നാല്‍ തങ്ങളുടെ പൗരന്മാര്‍ക്ക് വേണ്ടത്ര വാക്‌സിനില്ലെന്നു പറഞ്ഞ് ആവശ്യം ഇസ്‌റാഈല്‍ തള്ളി. ഇസ്‌റാഈലിനോട് യു.എന്‍ ഈ ആവശ്യമുന്നയിച്ചതായി ഫലസ്തീനിലെ ഡബ്ല്യു.എച്ച്.ഒ തലവന്‍ ജെറാള്‍ഡ് റോക്കന്‍സ്‌ചോബാണ് വെളിപ്പെടുത്തിയത്. 8,000 ഫലസ്തീനി ആരോഗ്യപ്രവര്‍ത്തകര്‍ക്ക് കൊവിഡ് ബാധിച്ചിട്ടുണ്ട്.
കഴിഞ്ഞയാഴ്ച അന്താരാഷ്ട്ര മനുഷ്യാവകാശ സംഘടനയായ ആംനസ്റ്റി ഇന്റര്‍നാഷനലും അധിനിവിഷ്ട വെസ്റ്റ്ബാങ്കിലെയും ഗസ്സയിലെയും ഫലസ്തീനികള്‍ക്ക് കൊവിഡ് വാക്‌സിന്‍ ഡോസുകള്‍ നല്‍കാന്‍ ആവശ്യപ്പെട്ടിരുന്നു. നിലവില്‍ അധിനിവിഷ്ട വെസ്റ്റ്ബാങ്കില്‍ അനധികൃത പാര്‍പ്പിടകേന്ദ്രങ്ങളില്‍ താമസിക്കുന്ന ജൂതകുടിയേറ്റക്കാര്‍ക്കു മാത്രമാണ് ഇസ്‌റാഈല്‍ വാക്‌സിന്‍ നല്‍കുന്നത്. അതേസമയം കൊവിഡ് ശക്തമായി തുടരുന്ന ഫലസ്തീനില്‍ 24 മണിക്കൂറിനിടെ 12 പേര്‍ മഹാമാരി മൂലം മരിച്ചതായി ഫലസ്തീന്‍ ആരോഗ്യമന്ത്രി മായ് അല്‍ കൈല അറിയിച്ചു.