റിയാദ്: സഊദിയിൽ അനധികൃത മാർഗ്ഗത്തിലൂടെ പണം സ്വീകരിക്കുകയും പുറത്തേക്ക് അയക്കുകയും ചെയ്‌ത കേസിൽ അഞ്ച് വിദേശികൾ പിടിയിൽ. റിയാദ് പ്രവിശ്യ പൊലീസാണ് അഞ്ച് യമനി പൗരന്മാരെ അറസ്‌റ്റ് ചെയ്‌തത്‌. അനധികൃത മാർഗ്ഗങ്ങളിലൂടെ പണം സമ്പാദിക്കുകയും മൂന്ന് സഊദി പൗരന്മാരുടെ വാണിജ്യ സ്ഥാപനങ്ങളുടെ ബാങ്ക് അക്കൗണ്ടുകൾ വഴി പുറത്തേക്ക് അയക്കാനും നടത്തിയ ശ്രമത്തിനിടെയാണ് ഇവർ പിടിയിലായത്. സഊദി പൗരന്മാരുടെ സാമ്പത്തിക ഇടപാടുകൾ ഇവരായിരുന്നു കൈകാര്യം ചെയ്‌തിരുന്നത്‌. ഇത് മുതലെടുത്താണ് പണം പുറം രാജ്യത്തേക്ക് അയക്കാൻ ശ്രമം നടത്തിയത്. 

    പത്ത് ലക്ഷത്തിലധികം റിയാൽ ഇവരിൽ നിന്ന് പിടിച്ചെടുക്കുകയും ചെയ്‌തിട്ടുണ്ട്‌. പിടികൂടിയ പ്രതികളെ തുടർ നടപടികൾക്കായി പബ്ലിക് പ്രോസിക്യൂഷന് കൈമാറി. അനധികൃതമായി പണം സ്വീകരിക്കുന്നതും അനധികൃത മാർഗങ്ങളിലൂടെ കൈമാറുന്നതും പുറത്തേക്കയക്കുന്നതും കടുത്ത ശിക്ഷ നടപടികൾ നേരിടേണ്ടി വരുന്ന കുറ്റകൃത്യമാണ്.