മദീന: സമസ്ത ഇസ്‌ലാമിക് സെന്റർ മദീന സെൻട്രൽ കമ്മിറ്റിയുടെ നേതൃത്വത്തിൽ മനുഷ്യജാലികാ ഐക്യദാർഢ്യ സംഗമം നടത്തി. മദീന ഇസ്‌ലാമിക് സെന്ററിലും ഓൺലൈൻ വഴിയും നടന്ന പരിപാടിയിൽ രാജ്യത്തിന്റെ സ്വാതന്ത്ര്യ സമര പോരാട്ട ഭൂമിയിൽ മുസ്‌ലിം സമുദായം നൽകിയ സംഭാവനകൾ വിസ്മരിക്കരുതെന്നും രാജ്യ നിർമ്മിതിയിൽ ഭരണഘടന നൽകിയ അവസരങ്ങളും അവകാശങ്ങളും നേടിയെടുക്കാൻ നാം പ്രാപ്തരാവണമെന്നും പ്രഭാഷകർ ആഹ്വാനം ചെയ്‌തു. സർക്കാർ സർവീസിൽ സമുദായം അനുഭവിക്കുന്ന പ്രശ്നങ്ങൾ പരിഹരിക്കുന്നതിനാശ്യമായ ഇടപെടൽ സർക്കാർ തലത്തിൽ ഉണ്ടാവണമെന്നും യോഗം ആവശ്യപ്പെട്ടു. സമസ്ത ഇസ്‌ലാമിക് സെന്റർ  നാഷണൽ കമ്മിറ്റി പ്രസിഡണ്ട് സയ്യിദ് ഉബൈദുല്ല തങ്ങൾ അൽ ഐദുറൂസി സംഗമം ഉദ്ഘാടനം ചെയ്തു സംസാരിച്ചു.

     ചെയർമാൻ സൈദു ഹാജി അധ്യക്ഷത വഹിച്ചു. നഫ്‌സൽ ജാലിക പ്രതിജ്ഞ ചൊല്ലികൊടുത്തു. ഡൽഹിയിൽ രാജ്യത്തെ അന്നമൂട്ടുന്ന കർഷകർ നടത്തുന്ന സമരത്തിന് ഐക്യദാർഢ്യം പ്രഖ്യാപിച്ച് അശ്റഫ് തിലങ്കേരി പ്രേമേയം അവതരിപ്പിച്ചു. ശിഹാബ് സ്വാലിഹി വൈത്തിരി പ്രമേയ പ്രഭാഷണവും റാശിദ് ദാരിമി, സുലൈമാൻ ഹാജി, നൗഷാദ് ഇർഫാനി, ഫസൽ കീഴ്പള്ളി, അശ്റഫ് അഴിഞ്ഞിലം എന്നിവർ സംസാരിച്ചു. മുഹമ്മദ് മുസലിയാർ കാവനൂർ സ്വാഗതവും സലീം മുറയൂർ നന്ദിയും പറഞ്ഞു.