സുനി അൽഹാദി
കൊച്ചി
നികുതി അടയ്ക്കാത്ത സ്വകാര്യബസുകൾക്കെതിരേ മോട്ടോർവാഹന വകുപ്പ് നടപടിയാരംഭിച്ചു. വിവിധ റൂട്ടുകളിൽ സർവിസ് നടത്തുന്ന 3500ൽ അധികം സ്വകാര്യ ബസുകൾക്കെതിരേയാണ് നടപടി. വരുംദിവസങ്ങളിൽ ബസുകൾ പിടിച്ചെടുക്കുന്നതുൾപ്പെടെ നടപടിയിലേക്ക് നീങ്ങുമെന്നാണ് സൂചന. കഴിഞ്ഞവർഷം ജൂലൈ മുതൽ ഡിസംബർ വരെ രണ്ട് പാദങ്ങളിലെ കുടിശ്ശിക അടയ്ക്കാത്തവർക്ക് 7500രൂപ മുതൽ പിഴയും ഇടാക്കുന്നുണ്ട്. ബസുകൾക്ക് സ്റ്റോപ്പ് മെമ്മോയും ലഭിച്ചിട്ടുണ്ട്. ബസുടമകളെയും തൊഴിലാളികളെയും കടുത്ത പ്രതിസന്ധിയിലേക്ക് തള്ളിവിടുന്നതാണ് നടപടിയെന്ന് പ്രൈവറ്റ് ബസ് ഓപ്പറേറ്റേഴ്‌സ് ഫെഡറേഷൻ സംസ്ഥാന പ്രസിഡന്റ് എം.ബി സത്യൻ 'സുപ്രഭാത' ത്തോട് പറഞ്ഞു. 2009ൽ 12,000 ബസുകൾ സർവിസ് നടത്തിയിരുന്നെങ്കിൽ ഇപ്പോൾ 7,500 ബസുകളാണ് നിരത്തിലോടുന്നത്. 2021 ജൂലൈ മുതൽ ഡിസംബർ വരെയുള്ള രണ്ട് പാദങ്ങളിലെ നികുതി ഒരുമിച്ച് അടക്കേണ്ടി വന്നതാണ് ബസുടമകൾക്ക് വിനയായത്.

കൊവിഡ് പ്രതിസന്ധിയും ഡീസൽ വിലയിലെ വർധനവുമൂലവും പല ഉടമകൾക്കും ഭാരിച്ച റോഡ് നികുതി അടക്കാൻ കഴിഞ്ഞില്ല. ജൂലൈ, ഓഗസ്റ്റ്, സെപ്റ്റംബർ മാസങ്ങളിലെ നികുതി ഒഴിവാക്കി നൽകണമെന്ന് രാമചന്ദ്രൻ കമ്മിഷൻ ശുപാർശ ചെയ്തിരുന്നു. നികുതിയിൽ ഇളവ് നൽകുമെന്ന സർക്കാർ ഉറപ്പിലായിരുന്നു ഉടമകൾ പണം കടമെടുത്തും മറ്റും അറ്റകുറ്റപ്പണി നടത്തി ബസുകൾ നിരത്തിലിറക്കിയത്. നിലവിൽ കുടിശ്ശിക വരുത്തിയ ബസുടമ നികുതിയുടെ പത്ത് ശതമാനം പലിശയും കുടിശ്ശിക വരുത്തിയ കുറ്റത്തിന് 7500രൂപ പിഴയും നികുതിയും ഉൾപ്പെടെ വൻ തുകയാണ് അടക്കേണ്ടിവരുന്നത്. സാമ്പത്തിക പ്രയാസം അനുഭവിക്കുന്നവർ ഗതാഗത മന്ത്രിയെ നേരിട്ടുകണ്ട് അപേക്ഷ നൽകിയാൽ തുക ഗഡുക്കളായി അടയ്ക്കാൻ അവസരം ഒരുക്കും. ദൂരജില്ലകളിൽനിന്ന് തിരുവനന്തപുരത്ത് അപേക്ഷയുമായി എത്തുന്നവർ ഏറെ ദുരിതം അനുഭവിക്കുന്നുണ്ടെന്നും പ്രസിഡന്റ് പറഞ്ഞു.