കണ്ണൂര്‍
തോട്ടടയില്‍ കല്യാണ വീട്ടിലേക്ക് ബോംബെറിഞ്ഞ സംഭവത്തില്‍ വഴിത്തിരിവ്. ബോംബേറില്‍ കൊല്ലപ്പെട്ടത് ബോംബുമായി എത്തിയ സംഘത്തിലെ യുവാവ് തന്നെയാണെന്നാണ് വിവരം. ബോംബേറില്‍ ഏച്ചൂര്‍ സ്വദേശി ജിഷ്ണുവാണ് (26) കൊല്ലപ്പെട്ടത്. സംഘാംഗം എറിഞ്ഞ ബോംബ് ജിഷ്ണുവിന്റെ തലയില്‍ കൊള്ളുകയായിരുന്നു. ആദ്യം എറിഞ്ഞ ബോംബ് പൊട്ടാത്തതിനെ തുടര്‍ന്ന് ഇത് എടുക്കാന്‍ പോയ ജിഷ്ണുവിന്റെ തലയില്‍ രണ്ടാംമത് എറിഞ്ഞ ബോംബ് കൊള്ളുകയായിരുന്നു. സംഭവത്തില്‍ പരുക്കേറ്റ രണ്ടു പേരെ പൊലിസ് കസ്റ്റഡിയിലെടുത്തു.

ഞായറാഴ്ച ഉച്ചയ്ക്ക് രണ്ടുമണിയോടെ തോട്ടടയിലെ കല്ല്യാണവീടിന്റെ സമീപത്താണ് ബോംബേറുണ്ടായത്. കല്ല്യാണവീട്ടില്‍ കഴിഞ്ഞദിവസം രാത്രി നടന്ന സംഗീതപരിപാടിക്കിടെ വാക്കേറ്റവും കൈയാങ്കളിയും ഉണ്ടായിരുന്നു. തര്‍ക്കം നാട്ടുകാര്‍ ഇടപെട്ട് പരിഹരിച്ചിരുന്നു. വിവാഹച്ചടങ്ങ് കഴിഞ്ഞ് വരനും വധുവും അടക്കമുള്ളവര്‍ വീട്ടിലേക്ക് വരുന്നതിനിടെയാണ് സ്‌ഫോടനമുണ്ടായത്.

കൊല്ലപ്പെട്ട ജിഷ്ണുവിന്റെ തലയോട്ടി ചിതറിയനിലയിലാണ്. ശനിയാഴ്ച രാത്രിയുണ്ടായ തര്‍ക്കത്തിന് പ്രതികാരമായാണ് സംഘം ബോംബുമായി വന്നതെന്നാണ് നിഗമനം. ഏച്ചൂര്‍ ബാലക്കണ്ടി വീട്ടില്‍ പരേതനായ മോഹനന്‍-ശ്യാമള ദമ്പതിമാരുടെ മകനാണ് ജിഷ്ണു. കെട്ടിടനിര്‍മാണ തൊഴിലാളിയാണ്.