കൊച്ചി
ജൂനിയർ വിദ്യാർഥികളെ റാഗ് ചെയ്ത കേസിലെ പ്രതികള്‍ക്ക് ഹൈക്കോടതി രണ്ടാഴ്ചത്തെ സാമൂഹികസേവനം ശിക്ഷയായി വിധിച്ചു. കൊല്ലം ടി.കെ.എം എന്‍ജിനീയറിങ് കോളജിലെ രണ്ട് ജൂനിയര്‍ വിദ്യാര്‍ഥികളെ റാഗ് ചെയ്ത അഞ്ച് സീനിയര്‍ വിദ്യാര്‍ഥികളോടാണ് ഹൈക്കോടതി നിര്‍ബന്ധിത സാമൂഹിക സേവനത്തിന് ഉത്തരവിട്ടത്. തങ്ങള്‍ക്കെതിരേയുള്ള കേസ് റദ്ദാക്കണമെന്നാവശ്യപ്പെട്ടു സമര്‍പ്പിച്ച ഹരജിയിലാണ് സര്‍ക്കാര്‍ ആശുപത്രിയില്‍ സാമൂഹിക -സന്നദ്ധ പ്രവര്‍ത്തനങ്ങള്‍ നടത്താൻ ജസ്റ്റിസ് കെ ഹരിപാലിന്റെ ഉത്തരവ്. കേസിലെ വാദികളും പ്രതികളും തമ്മിലുള്ള പ്രശ്നങ്ങള്‍ രമ്യമായി പരിഹരിച്ചുവെന്നു ചൂണ്ടിക്കാട്ടിയാണ് ഹരജി സമര്‍പ്പിച്ചത്.
എന്നാൽ പ്രതികള്‍ക്കെതിരേയുള്ള കുറ്റത്തിന്റെ ഗൗരവം കണക്കിലെടുത്ത് പ്രതികള്‍ ജില്ലാ ലീഗല്‍ സര്‍വിസസ് അതോറിറ്റിയുടെ കീഴില്‍ സാമൂഹിക സേവനം നടത്തുന്നതിനു നിര്‍ദ്ദേശിക്കണമെന്നു സര്‍ക്കാര്‍ അഭിഭാഷകന്‍ കോടതിയില്‍ ആവശ്യപ്പെട്ടു. തുടര്‍ന്നാണ് കോടതി സാമൂഹിക സേവനത്തിനു നിര്‍ദേശം നല്‍കിയത്. ഓരോ ദിവസവും ചുരുങ്ങിയത് എട്ടു മണിക്കൂറെങ്കിലും രണ്ടാഴ്ച സേവനം നടത്തണമെന്നാണ് ഉത്തരവ്. പ്രതികള്‍ക്കെതിരേയുള്ള കേസ് കോടതി റദ്ദാക്കി.