കുന്ദമംഗലം: കുന്ദമംഗലം മണ്ഡലത്തില്‍ തീപാറുന്ന പോരാട്ടം. നിരന്തരം മാറിമറഞ്ഞുകൊണ്ടിരിക്കുന്ന മണ്ഡലത്തിലെ ചിത്രം ഇത്തവണ പ്രവചനാതീതമാണ്. നിരന്തരം ചാഞ്ചാട്ടത്തിന് വിധേയമാകുന്ന കുന്ദമംഗലം നിയോജക മണ്ഡലം തിരിച്ചു പിടിക്കാനുള്ള ദൗത്യവുമായാണ് യു.ഡി.എഫില്‍ മുസ്‌ലിം ലീഗിന് അനുവദിച്ച സീറ്റില്‍ ഡി.സി.സി ജനറല്‍ സെക്രട്ടറി കൂടിയായ ദിനേശ് പെരുമണ്ണയെ അങ്കത്തിനിറക്കിയത്. പട്ടികജാതി സംവരണമായിരുന്ന മണ്ഡലത്തില്‍ 2001ലെ നിയമസഭാ തെരഞ്ഞെടുപ്പില്‍ യു.സി രാമനെ മുസ്‌ലിം ലീഗ് സ്വതന്ത്രനായി രംഗത്തിറക്കിയാണ് യു.ഡി.എഫ് മണ്ഡലം പിടിച്ചെടുത്തത്. ഇതേ അടവ് തന്നെയാണ് മുസ്‌ലിം ലീഗ് ഇത്തവണയും പയറ്റുന്നത്.

2006 ലും യു.സി വിജയം ആവര്‍ത്തിച്ചെങ്കിലും മണ്ഡലത്തിലെ സംവരണം എടുത്തു മാറ്റിയതോടെ 2011 ല്‍ പി.ടി.എ റഹിമിനോട് യു.സി രാമന്‍ 3,267 വോട്ടിന് പരാജയപ്പെട്ടു.

2016 ല്‍ കോണ്‍ഗ്രസിലെ അഡ്വ.ടി. സിദ്ദീഖിനെ 11,205 വോട്ടിന് പരാജയപ്പെടുത്തി പി.ടി.എ റഹിം വിജയം ആവര്‍ത്തിച്ചു. നേരത്തെ കുന്ദമംഗലം മണ്ഡലത്തിലെ ഭാഗമായിരുന്ന കുരുവട്ടൂര്‍, മുക്കം പഞ്ചായത്തുകള്‍ കുന്ദമംഗലത്ത് നിന്നും വേര്‍പ്പെടുത്തുകയും ഒളവണ്ണ ഉള്‍പ്പെടുത്തുകയും ചെയ്യുകയായിരുന്നു. ഇതോടെ എല്‍.ഡി.എഫിന്റെ സ്വാധീന മേഖലയായി കുന്ദമംഗലം മണ്ഡലം മാറിയെങ്കിലും 2019 ലെ പാര്‍ലെമന്റ് തെരഞ്ഞെടുപ്പില്‍ യു.ഡി.എഫിലെ എം.കെ രാഘവന് 11,292 വോട്ടിന്റെ ലീഡ് നേടാനായത് യു.ഡി.എഫ് ക്യാംപില്‍ ആത്മവിശ്വാസം വര്‍ധിപ്പിച്ചിട്ടുണ്ട്. ഇക്കഴിഞ്ഞ ത്രിതല പഞ്ചായത്ത് തെരഞ്ഞെടുപ്പില്‍ ഇടതുമുന്നണിയുടെ ശക്തി കേന്ദ്രമായ ജില്ലാ പഞ്ചായത്ത് പെരുമണ്ണ ഡിവിഷനില്‍ യു.ഡി.എഫ് കളത്തിലിറക്കിയത് ദിനേശ് പെരുമണ്ണയെയായിരുന്നു. 2015 ല്‍ 6,000 ത്തില്‍ പരം വോട്ടിന്റെ ലീഡുണ്ടായിരുന്ന എല്‍.ഡി.എഫിന് ദിനേശ് പെരുമണ്ണയുടെ മുന്നില്‍ കാലിടറി. സി.പി.എമ്മിന്റെ ലീഡ് 1004 വോട്ട് മാത്രമായി ക്കുറഞ്ഞു. 2005ല്‍ കുരുവട്ടൂര്‍ ഡിവിഷനില്‍ നിന്നും 2010 ല്‍ പന്തിരാങ്കാവ് ഡിവിഷനില്‍ നിന്നും ജില്ലാ പഞ്ചായത്തിലേക്ക് ദിനേശ് പെരുമണ്ണ വിജയിച്ചിട്ടുണ്ട്. എല്‍ഡി.എഫിന്റെ സ്വാധീന മേഖലയായ ഒളവണ്ണ, പെരുമണ്ണ പഞ്ചായത്തുകളില്‍ ദിനേശ് പെരുമണ്ണയിലൂടെ മുന്നേറ്റം നടത്താനായാല്‍ യു.ഡി.എഫിന് തിരിച്ചുവരാനാവും. പൗരത്വഭേദഗതി നിയമം ഉള്‍പ്പെടെയുള്ളവയ്‌ക്കെതിരേ നിരന്തരം പോരാട്ടത്തിനിറങ്ങിയ ദിനേശ് മണ്ഡലത്തിലുടനീളം സുപരിചിതനാണ്. വികസനരംഗത്ത് കാലാനുസൃതമായ വിപ്ലവം സൃഷ്ടിക്കാന്‍ 10 വര്‍ഷം മണ്ഡലത്തെ പ്രതിനിധീകരിച്ച പി.ടി.എ റഹീമിന് കഴിഞ്ഞില്ല എന്നാണ് യു.ഡി.എഫ് ആരോപിക്കുന്നത്. തെങ്ങിലക്കടവ് കാന്‍സര്‍ ഇന്‍സ്റ്റിറ്റ്യൂട്ട്, മാവൂര്‍ ഗ്രാസിം ഫാക്ടറി, വെള്ളായിക്കോട് പാലം, ചെറൂപ്പ പ്രാഥമികാരോഗ്യ കേന്ദ്രം എന്നിവ വികസന മുരടിപ്പിന്റെ ഉദാഹരണങ്ങളായി യു.ഡി.എഫ് ചൂണ്ടിക്കാട്ടുന്നു. കഴിഞ്ഞ 10 വര്‍ഷം കുന്ദമംഗലത്തു നിറഞ്ഞു നിന്ന പി.ടി.എ റഹീം എം.എല്‍.എയെ തന്നെയാണ് മണ്ഡലം നിലനിലനിര്‍ത്താന്‍ എല്‍.ഡി.എഫ് വീണ്ടും അങ്കത്തിന്നിറക്കിയത്.

സി.പി.എം സ്വതന്ത്രനായി മത്സരിക്കുന്ന അദ്ദേഹം കൊടുവള്ളി മണ്ഡലത്തില്‍ നിന്ന് 2006ല്‍
കെ. മുരളീധരനെ 7,506 വോട്ടുകള്‍ക്ക് പരാജയപ്പെടുത്തിയാണ് ആദ്യമായി എം.എല്‍.എയാകുന്നത്. മണ്ഡലം പുനര്‍വിഭജനമുണ്ടായതോടെ 2011 ല്‍ കുന്ദമംഗലത്തേക്ക് മാറിയ റഹീം രണ്ടുതവണ കുന്ദമംഗലത്തെ പ്രതിനിധീകരിച്ച യു.സി രാമനെയാണ് കടുത്ത പോരാട്ടത്തില്‍ പരാജയപ്പെടുത്തിയത്.
ബി.ജെ.പിയുടെ ജില്ലയിലെ എക്ലാസ് മണ്ഡലമായ കുന്ദമംഗലത്ത് യുവമോര്‍ച്ചയുടെ സംസ്ഥാനതല ചുമതലയുള്ള വി.കെ സജീവനെയാണ് എന്‍.ഡി.എയ്ക്ക് വേണ്ടി കളത്തിലിറങ്ങിയത്.