പാലപ്പിള്ളി(തൃശൂർ )
പാലപ്പിള്ളിയിലെ റബ്ബർതോട്ടത്തിൻ്റെ വിവിധ ഭാഗങ്ങളിൽ തമ്പടിച്ചിരിക്കുന്ന അമ്പതോളംവരുന്ന കാട്ടാനക്കൂട്ടത്തെ കാട് കയറ്റാനുള്ള വനംവകുപ്പിൻ്റെ ശ്രമം ഇന്നലെയും തുടർന്നു. പാലപ്പിള്ളി റേഞ്ച് ഓഫിസർ കെ.പി പ്രേം ഷമീറിൻ്റെ നേതൃത്വത്തിലുള്ള വനപാലകരാണ് ആനകളെ തുരത്താൻ രംഗത്തുള്ളത്. ഞായറാഴ്ച രാത്രിയിൽ എത്തിയ കാട്ടാനക്കൂട്ടം പാലപ്പിള്ളി സെൻ്ററിലും പരിസരത്തും നാശംവിതച്ചിരുന്നു.പിന്നീട് കൊച്ചിൻ മലബാറിൻ്റെ തോട്ടത്തിലേക്ക് കയറിയ ആനകൾ അവിടെത്തന്നെ തമ്പടിക്കുകയായിരുന്നു. പടക്കം പൊട്ടിച്ചും പാട്ടകൊട്ടിയും ആനകളെ ചിമ്മിനി ഡാമിൻ്റെ പരിസരത്തെ കാടുകളിലേക്ക് മാറ്റാനാണ് ശ്രമം. ഇതിനായി വിവിധ ഫോറസ്റ്റ് ഡിവിഷനുകളിലെ പരിചയസമ്പന്നരായ വാച്ചർമാരെ എത്തിക്കുമെന്ന് റേഞ്ച് ഓഫിസർ അറിയിച്ചു. കഴിഞ്ഞ ദിവസം വൈകിട്ട് കാട്ടാന ഓടിച്ച് ഒരു തൊഴിലാളിയ്ക്ക് പരുക്കേറ്റിരുന്നു.