മുളേളരിയ: സെക്രട്ടറിയും അസിസ്റ്റന്റ് എന്‍ജിനിയറുമില്ലാതെ കാറഡുക്ക പഞ്ചായത്തില്‍ പദ്ധതി പ്രവര്‍ത്തനം വഴിമുട്ടുന്നു. 10 ദിവസം മുമ്പാണു സെക്രട്ടറിയെ സ്ഥലം മാറ്റിയത്. സ്ഥലം മാറ്റിയതല്ലാതെ ഇതുവരെ പകരം നിയമനം ഉണ്ടായിട്ടില്ല. ഇതു കാരണം വിവിധ ആവശ്യങ്ങള്‍ക്കായി ഓഫിസിലെത്തുന്ന ജനങ്ങള്‍ ദുരിതത്തിലാവുകയാണ്. ഓഫിസ് പ്രവര്‍ത്തനം തന്നെ സ്തംഭിച്ച അവസ്ഥയിലാണ്.
പഞ്ചായത്തിലെ പദ്ധതി പ്രവര്‍ത്തനങ്ങള്‍ക്കു മേല്‍ നോട്ടം വഹിക്കേണ്ട അസിസ്റ്റന്റ് എന്‍ജിനിയറെ ആറുമാസം മുമ്പാണു സ്ഥലം മാറ്റിയത്. കാറഡുക്ക ബ്ലോക്ക് പഞ്ചായത്ത് എന്‍ജിനിയര്‍ക്ക് അധിക ചുമതല നല്‍കിയിരിക്കുകയാണ്. ഈ എന്‍ജിനിയര്‍ക്കാവട്ടെ ബ്ലോക്ക് പഞ്ചായത്തിന്റെയും കാറഡുക്ക പഞ്ചായത്തിന്റെയും കൂടാതെ മറ്റൊരു പഞ്ചായത്തിന്റെയും അധിക ചുമതല കൂടിയുണ്ട്.
 അതിനിടെ ബ്ലോക്കിന്റെയും മറ്റു രണ്ടു പഞ്ചായത്തുകളുടെയും അധിക ചുമതല ഒരാള്‍ക്കു തന്നെ നല്‍കിയതിനാല്‍ മൂന്നിടങ്ങളിലെ പദ്ധതി പ്രവര്‍ത്തനങ്ങള്‍ അവതാളത്തിലാക്കുന്നുവെന്ന ആക്ഷേപവുമുണ്ട്.
വിവിധ ഗ്രാമസഭകളില്‍ നടപ്പിലാക്കുന്ന പദ്ധതികാര്യങ്ങള്‍ക്ക് ഏറെ അത്യാവശ്യമായ സെക്രട്ടറിയുടെയും അസിസ്റ്റന്റ് എന്‍ജിനിയറുടെയും അഭാവം പഞ്ചായത്തിന്റെ വികസന പ്രവര്‍ത്തനങ്ങള്‍ തന്നെ നിശ്ചലമായിരിക്കുകയാണെന്നാണ് നാട്ടുകാര്‍ പറയുന്നത്.