കഴിഞ്ഞ കുറച്ചുദിവസങ്ങളായി സമൂഹമാധ്യമങ്ങളിലെല്ലാം ചിരിപടര്‍ത്തി നിറഞ്ഞോടിക്കൊണ്ടിരിക്കുന്ന ഒരു വീഡിയോ ഉണ്ട്. മൂന്ന് പേര്‍ സ്‌കൂട്ടറില്‍ വരുന്നതും പൊലിസിനെ കണ്ട് തിരിഞ്ഞ് ചിതറിയോടുന്നതുമായ ഒരു വീഡിയോ. കേരള പൊലിസ് തങ്ങളുടെ ഒഫീഷ്യല്‍ പേജില്‍ പോലും പങ്കുവെച്ച ആ വീഡിയോയ്ക്ക് പിന്നിലെ കഥാപാത്രങ്ങളെ പരിചയപ്പെടാം.

കൊല്ലം ആയൂര്‍ മഞ്ഞപ്പാറയിലാണ് സംഭവം നടക്കുന്നത്. പഞ്ചായത്ത് മെമ്പര്‍ കൂടിയാണ് നമ്മുടെ കഥാനായകന്‍. ഷിബിലി,അന്‍വര്‍ എന്നിവരാണ് കൂടെയുണ്ടായിരുന്നത്.

തണല്‍ എന്ന ജീവകാരുണ്യ സംഘടനയുടെ റംസാന്‍ കിറ്റ് വിതരണവുമായി ബന്ധപ്പെട്ട് പോകവെയാണ് പൊലിസിനെ കണ്ടതെന്നാണ് അദ്ദേഹം പറയുന്നത്. പൊലിസ് സമീപത്തെത്തി കാര്യം അന്വേഷിച്ചപ്പോള്‍ ചെയ്തത് തെറ്റാണെന്ന് ബോധ്യമുള്ളതു കൊണ്ട് കുറ്റസമ്മതം നടത്തുകയും പൊലിസ് താക്കീത് നല്‍കി പറഞ്ഞയക്കുകയുമായിരുന്നു.

സഹോദരന്റെ വീടിനുസമീപത്തുനിന്നാണ് സംഭവമുണ്ടായത്. വീട്ടിലെ സി.സി.ടിവി ദൃശ്യങ്ങള്‍ സഹോദരനാണ് പ്രാദേശിക വാട്‌സ്ആപ്പ് ഗ്രൂപ്പില്‍ പോസ്റ്റ് ചെയ്തത്. പിന്നീടത് മറ്റുള്ള ഗ്രൂപ്പുകളിലേക്ക് ഷെയര്‍ ചെയ്യപ്പെടുകയും വൈറലാവുകയുമായിരുന്നു.

വീഡിയോയ്ക്ക് പിന്നാലെ നിരവധി കമന്റുകളാണ് വന്നിരിക്കുന്നത്. ഓസ്‌കര്‍ അവാര്‍ഡ് വരെ നല്‍കാന്‍ പോന്ന നടനാണ് അദ്ദേഹമെന്നാണ് ചിലരുടെ അഭിപ്രായം.