കോഴിക്കോട്: മലയാളി മാധ്യമപ്രവര്‍ത്തകന്‍ സിദ്ദീഖ് കാപ്പന്റെ ജീവന്‍ അപകടത്തിലാണെന്നും ഈ അവസരത്തിലെങ്കിലും കേരളത്തിന്റെ മുഖ്യമന്ത്രി അദ്ദേഹത്തിന്റെ ജീവന്‍ രക്ഷിക്കാന്‍ ഇടപെടണമെന്നും സിദ്ധീഖിന്റെ ഭാര്യ റൈഹാനത്ത്. മാധ്യമങ്ങള്‍ക്കു മുമ്പില്‍ വളരെ വൈകാരികമായായിരുന്നു അവരുടെ പ്രതികരണം. സിദ്ധീഖിന്റെ കാര്യത്തില്‍ ഇടപെടാന്‍ മുഖ്യമന്ത്രിക്ക് പേടിയാണോ എന്നും അവര്‍ ചോദിച്ചു. പല തവണ മുഖ്യമന്ത്രിക്കു കത്തെഴുതി. കെ.യു.ഡബ്ല്യു.ജെയുടെ നേതൃത്വത്തില്‍ അവരും ശ്രദ്ധയില്‍പ്പെടുത്തി. എന്നിട്ടും അദ്ദേഹം പ്രതികരിക്കുന്നില്ല. പോപ്പുലര്‍ ഫ്രണ്ടിന്റെ നേതൃത്വത്തിലുള്ള പത്രത്തില്‍ ജോലി ചെയ്തതുകൊണ്ടാണോ സിദ്ധീഖിനു നീതിവേണ്ടെന്ന്നി ലപാടെന്നും അവര്‍ ചോദിച്ചു. കൊവിഡ് ചികിത്സക്കായി പ്രവേശിക്കപ്പെട്ട ആശുപത്രിയില്‍ അതിക്രൂര പീഡനമാണ് കാപ്പന്‍ നേരിടുന്നത്. അടിസ്ഥാന ആവശ്യങ്ങള്‍ പോലും നിഷേധിക്കുകയാണ്.

മുഖ്യമന്ത്രിക്ക് നിയമത്തിന്റെ വഴിയില്‍ ഒന്നും ചെയ്യാന്‍ പറ്റില്ലായിരിക്കാം. എന്നാല്‍ ഒരു കത്തയക്കുമ്പോഴേക്ക് അദ്ദേഹത്തിന് എന്തെങ്കിലും സംഭവിക്കുമോ? എന്താണ് അതിന്റെ പരിമിതി എന്ന് എനിക്ക് മനസ്സിലാകുന്നില്ല. തെരഞ്ഞെടുപ്പാണ് പേടിയെങ്കില്‍ അതൊക്കെ കഴിഞ്ഞില്ലേ? ഇനിയുമെന്തെങ്കിലും പറഞ്ഞുകൂടേ? വോട്ടൊക്കെ പെട്ടിയിലായല്ലോ?' - റെയ്ഹാനത്ത് ചോദിച്ചു.

'മുഖ്യമന്ത്രിയുടെ ഓഫീസ് കാര്യങ്ങള്‍ അറിഞ്ഞിട്ടുണ്ട്. വിഷയത്തില്‍ യൂണിയന്‍ നേരത്തെ ഇടപെട്ടിരുന്നു. എം.പിമാര്‍ അവര്‍ക്ക് ചെയ്യാന്‍ കഴിയുന്നത് നോക്കുന്നുണ്ട്. മുഖ്യമന്ത്രിക്ക് വീണ്ടും കത്തയച്ചിട്ടുണ്ട്. തിരുവനന്തപുരത്തെ പത്രപ്രവര്‍ത്തക യൂണിയനും കത്തു നല്‍കിയിട്ടുണ്ട്. മുഖ്യമന്ത്രി ഇപ്പോഴെങ്കിലും ഇടപെടുമെന്ന് തന്നെയാണ് പ്രതീക്ഷ. രണ്ടോ നാലോ ദിവസം കഴിഞ്ഞിട്ടല്ല ഇതു വേണ്ടത്. ജീവന്‍ പോയിക്കഴിഞ്ഞ ശേഷം പറഞ്ഞിട്ട് കാര്യമുണ്ടാകില്ല. പോയാല്‍ ഞങ്ങള്‍ക്കേ പോകൂ. ഒരുപാട് മരണങ്ങളും കൊലകളും നടക്കുന്നത് കൊണ്ട് ആര്‍ക്കും ഇതൊരു വിഷയമാകില്ല. എന്റെ മക്കള്‍ക്കും എന്റെ കുടുംബത്തിനും അതൊരു വിഷയമാണ്. ഞങ്ങള്‍ക്ക് അദ്ദേഹത്തെ ജീവനോടെ തിരിച്ചുകിട്ടണം' - അവര്‍ വികാരാധീനയായി.

കൊവിഡ് ബാധിതനായി ജയിലില്‍ തളര്‍ന്നുവീണതിനെ തുടര്‍ന്നാണ് മഥുര ആശുപത്രിയില്‍ പ്രവേശിപ്പിക്കപ്പെട്ട സിദ്ദീഖ് മറ്റൊരാളുടെ ഫോണില്‍ സംസാരിവേയാണ് ഭാര്യ റൈഹാനത്തിനെ ഇക്കാര്യം അറിയിച്ചത്. മാനുഷിക പരിഗണനമാത്രമാണ് ആവശ്യപ്പെടുന്നത്. അദ്ദേഹത്തെ ജീവനോടെ ലഭിക്കുക എന്നത് എന്റെയും കുട്ടികളുടേയും ആവശ്യമാണ്. വോട്ടു കുറയുമെന്ന പേടിയായിരിക്കാം അദ്ദേഹത്തിന്. ഇപ്പൊ വോട്ടെല്ലാം കഴിഞ്ഞില്ലേ, ഇനിയെങ്കിലും ഇടപെട്ടുകൂടേ എന്നും റൈഹാന ചോദിച്ചു.

തീരെ അവശനായ സിദ്ദീഖിനെ ആശുപത്രിയിലെ കട്ടിലില്‍ ഇരുമ്പു ചങ്ങലകളാല്‍ കെട്ടിയിട്ടിരിക്കുകയാണെന്ന് റൈഹാനത്ത് പറയുന്നു. മൂത്രമൊഴിക്കാനായി ഒരു ബോട്ടില്‍ നല്‍കി. കക്കൂസില്‍ പോകാന്‍ അനുവദിക്കുന്നില്ല. ആശുപത്രിയിലെത്തി ദിവസങ്ങള്‍ കഴിഞ്ഞെങ്കിലും ഇതുവരെ കക്കൂസില്‍ പോകാന്‍ ചങ്ങലയില്‍ നിന്നും മോചിപ്പിച്ചിട്ടില്ല. എങ്ങനെയെങ്കിലും ജയിലിലേക്കെത്തിയാല്‍ മതിയെന്നും ആശുപത്രിയിലെ പീഡനം സഹിക്കാനാവുന്നില്ലെന്നും സിദ്ദീഖ് പറഞ്ഞതായി റൈഹാനത്ത് അറിയിച്ചു.