ഭുവനേശ്വർ: പക്ഷിയിടിച്ചതിനെ തുടർന്ന് ഭുവനേശ്വറിൽ എയർ ഏഷ്യ വിമാനം അടിയന്തരമായി നിലത്തിറക്കി. ഭുവനേശ്വറിലെ ബിജു പട്നായിക് അന്താരാഷ്ട്ര വിമാനത്താവളത്തിലാണ് അടിയന്തരമായി വിമാനം ഇറക്കിയത്. ഭുവനേശ്വറിൽ നിന്ന് പറന്നുയർന്നതിന് പിന്നാലെയാണ് വിമാനത്തിൽ പക്ഷിയിടിച്ചത്.

പുനെയിലേക്കുള്ള വിമാനമാണ് അടിയന്തര ലാൻഡിങ് നടത്തിയത്. വിമാനത്തിന് കാര്യമായ കേടുപാടുകൾ സംഭവിച്ചിട്ടില്ലെന്ന് അധികൃതർ വ്യക്തമാക്കി. വിശദ​ പരിശോധനയ്ക്ക് പിന്നാലെ വിമാനത്തിന് ടേക്ക് ഓഫിന് അനുമതി നൽകി.

സമീപ ദിവസങ്ങളിൽ അടിയന്തിരമായി ലാൻഡ് ചെയ്യുന്ന നാലാമത്തെ സംഭവമാണിത്. സൂററ്റ് - ഡൽഹി ഇൻഡി​ഗോ വിമാനം, കൊച്ചി - ഡൽഹി ഇൻഡി​ഗോ വിമാനം, കോഴിക്കോട് - ദമാം എയര്‍ ഇന്ത്യ എക്‌സ്പ്രസ് വിമാനം എന്നിവയാണ് ഈ ദിവസങ്ങളിൽ എമർജൻസി ലാൻഡിങ് നടത്തിയത്.