കോഴിക്കോട്: ഞെളിയന്‍പറമ്പ് മാലിന്യസംസ്‌കരണ പ്ലാന്റില്‍ തീപിടിത്ത മുന്‍കരുതല്‍ നടപടിയുമായി കോഴിക്കോട് കോര്‍പറേഷന്‍. പ്ലാന്റിലെ പ്ലാസ്റ്റിക്കുകള്‍ അടിയന്തരമായി നീക്കാന്‍ മേയര്‍ നിര്‍ദ്ദേശം നല്‍കി. വേര്‍തിരിച്ച മാലിന്യങ്ങള്‍ ഒരാഴ്ച്ചയ്ക്കുള്ളില്‍ മാറ്റണമെന്നാണ് സോണ്ട കമ്പനിയ്ക്ക് മേയര്‍ ബീനാ ഫിലിപ്പ് നിര്‍ദ്ദേശം നല്‍കിയിരിക്കുന്നത്. പ്രദേശത്ത് താപനില കുറയ്ക്കാനുള്ള നടപടികള്‍ സ്വീകരിക്കും.

മാലിന്യ കേന്ദ്രത്തെ സംരക്ഷിത മേഖലയായി പ്രഖ്യാപിച്ചു. അഗ്നിശമന സേനയ്ക്ക് എത്തിച്ചേരാന്‍ സൗകര്യം ഒരുക്കാനും മേയര്‍ വിളിച്ച യോഗത്തില്‍ തീരുമാനമായി. നടപടികളുടെ ഭാഗമായി കമ്പനിയുടെ എംഡിയെ വിളിച്ചു വരുത്തും. കരാറില്‍ മാറ്റം വരുത്തുന്ന കാര്യവും പരിഗണനയിലുണ്ടെന്നും മേയര്‍ വ്യക്തമാക്കി.

അതിനിടെ കോഴിക്കോട് ഞെളിയന്‍ പറമ്പ് മാലിന്യസംസ്‌കരണ കേന്ദ്രത്തിലേക്ക് ബിജെപി പ്രവര്‍ത്തകര്‍ പ്രതിഷേധപ്രകടനം നടത്തി. മാലിന്യ സംസ്‌കരണം വേഗത്തിലാക്കണം, ആരോപണ നിഴലിലുള്ള കരാര്‍ കമ്പനി സോണ്‍ട ഇന്‍ഫ്രാടെക്കിന കരിമ്പട്ടികയില്‍ ഉള്‍പ്പെടുത്തണം എന്നീ ആവശ്യങ്ങള്‍ ഉന്നയിച്ചായിരുന്നു പ്രതിഷേധം.