വിമാനത്തില്‍ അതിക്രമം നടത്തിയ യാത്രക്കാരന്‍ പിടിയില്‍. രമാകാന്ത് എന്നയാളെയാണ് മുംബൈ പൊലീസ് കസ്റ്റഡിയിലെടുത്തത്. ഇന്ത്യയില്‍ ജനിച്ചതാണെങ്കിലും നിലവില്‍ അമേരിക്കന്‍ പൗരനാണ് രമാകാന്ത്. ഇയാള്‍ വിമാനത്തിനകത്ത് പുകവലിക്കുകയും സഹയാത്രക്കാരോട് മോശമായി പെരുമാറുകയും ചെയ്‌തെന്നാണ് പരാതി. കൂടാതെ വിമാനത്തിന്റെ വാതില്‍ തുറക്കാന്‍ ശ്രമിച്ചതായും വിവരമുണ്ട്. ലണ്ടന്‍മുംബൈ വിമാനത്തില്‍ ഇന്നലെയാണ് സംഭവം നടന്നത്.

വിമാനത്തിന്റെ ശുചിമുറിയിലിരുന്ന് രമാകാന്ത് പുകവലിച്ചതിനെ തുടര്‍ന്ന് അലാം അടിച്ചപ്പോള്‍ വിമാനജീവനക്കാര്‍ ശുചിമുറിയുടെ സമീപത്തുചെന്നു വാതില്‍ തുറന്നപ്പോളാണ് സംഭവം അറിഞ്ഞത്. ഇയാളോടെ സിഗരറ്റ് മാറ്റാന്‍ ആവശ്യപ്പെട്ട വിമാന ജീവനക്കാരോട് ഇയാള്‍ ആക്രോശിക്കുകയും അക്രമാസക്തനാകുകയുമായിരുന്നു.ഒടുവില്‍ ഏറെ പണിപ്പെട്ടാണ് രമാകാന്തിനെ സീറ്റിലിരുത്തിയത്. പ്രകോപിതനായ ഇയാള്‍ അല്‍പ്പസമയത്തിനുശേഷം വിമാനത്തിന്റെ വാതില്‍ തുറക്കാനും ശ്രമം നടത്തി. ഇത് കണ്ടതോടെ മറ്റ് യാത്രക്കാര്‍ ബഹളമുണ്ടാക്കുകയായിരുന്നു.

ഇതോടെ സുരക്ഷ പ്രശ്‌നമുണ്ടാകുമെന്ന ഭയത്തില്‍ രമാകാന്തിനെ വിമാന ജീവനക്കാര്‍ ബന്ധിച്ചു. കൈകളും കാലുകളും കൂട്ടികെട്ടിയാണ് പിന്നീട് യാത്ര തുടര്‍ന്നത്. വിമാനം ലാന്റ് ചെയ്ത ഉടന്‍ ഇയാളെ പൊലീസിന് കൈമാറി. വിമാനജീവനക്കാര്‍ ഇയാള്‍ക്കെതരിരെ രേഖാമൂലം പരാതിയും നല്‍കിയിട്ടുണ്ട്.