റിയാദ്: പുതിയ ദേശീയ വിമാനക്കമ്പനി പ്രഖ്യാപിച്ച് സഊദി അറേബ്യ. റിയാദ് എയര്‍ എന്ന പേരിലാകും വിമാനക്കമ്പനി പ്രവർത്തിക്കുക. സഊദി കിരീടാവകാശിയും പ്രധാനമന്ത്രിയുമായ അമീര്‍ മുഹമ്മദ് ബിന്‍ സല്‍മാന്‍ ആണ് ദേശീയ വിമാനക്കമ്പനി പ്രഖ്യാപനം നടത്തിയത്. 

സൗദിയ കമ്പനിക്ക് പുറമെയാണ് റിയാദ് എയർ കൂടി സ്ഥാപിക്കുന്നത്. 2030 ഓടെ 100 ലധികം ലക്ഷ്യസ്ഥാനങ്ങളിലേക്ക് യാത്രക്കാരുടെ കണക്റ്റിവിറ്റി വര്‍ദ്ധിപ്പിക്കുന്നതിന് എയര്‍ലൈനിന് സാധിക്കുമെന്നാണ് പ്രതീക്ഷിക്കുന്നത്.

റിയാദ് എയര്‍ ഒരു പിഐഎഫ് (പബ്ലിക് ഇൻവെസ്റ്റ്മെന്റ് ഫണ്ട്) ഉടമസ്ഥതയിലുള്ള കമ്പനിയായിട്ടായിരിക്കും പ്രവർത്തിക്കുക. പിഐഎഫ് ഗവര്‍ണര്‍ യാസിര്‍ അല്‍ റുമയ്യനാണ് പുതിയ കാരിയറിന്റെ അധ്യക്ഷന്‍. വ്യോമയാനം, ഗതാഗതം, ലോജിസ്റ്റിക്സ് തുടങ്ങിയ മേഖലകളില്‍ 40 വര്‍ഷത്തിലേറെ അനുഭവസമ്പത്തുള്ള ടോണി ഡഗ്ലസിനെ സിഇഒ ആയി നിയമിച്ചു.

സഊദി അറേബ്യയുടെ സാംസ്‌കാരികവും പ്രകൃതിദത്തവുമായ ആകര്‍ഷണങ്ങള്‍ സന്ദര്‍ശിക്കാന്‍ ലോകമെമ്പാടുമുള്ള വിനോദസഞ്ചാരികള്‍ക്ക് എയര്‍ലൈന്‍ അവസരം നല്‍കും.