പ്രത്യേക ലേഖകൻ
തിരുവനന്തപുരം
ഷവർമ കഴിച്ച് ഭക്ഷ്യ വിഷബാധ മൂലം കാസർകോട് പ്ലസ് വൺ വിദ്യാർഥിനി മരിച്ചതിനു പിന്നാലെ, വിഷം വരുന്ന വഴി തടയാൻ സംസ്ഥാന വ്യാപകമായി ഭക്ഷ്യസുരക്ഷാ-തദ്ദേശ വകുപ്പുകൾ നടത്തുന്ന പരിശോധന തുടരുന്നു. കഴിഞ്ഞ ദിവസങ്ങളിൽ ചെറുകിട ഹോട്ടലുകളിൽ മാത്രം പരിശോധന നടത്തിയെന്ന ആക്ഷേപത്തെ തുടർന്ന് ഇന്നലെ സംസ്ഥാനത്തെ ബാർ ഹോട്ടലുകളിലേക്കും സ്റ്റാർ ഹോട്ടലുകളിലേക്കും മാർജിൻഫ്രീ ഷോപ്പുകളിലേക്കും പരിശോധന വ്യാപിപ്പിച്ചു. തിരുവനന്തപുരത്ത് ആശുപത്രി കാന്റീനിലും മെസിലും ബാർ ഹോട്ടലിലും നിന്നുമായി പഴകിയ ഭക്ഷണ സാധനങ്ങൾ പിടികൂടി. തലസ്ഥാനത്തെ പ്രമുഖ ആശുപത്രിയിലെ മെസിൽ നിന്നും കാന്റീനിൽ നിന്നുമായി പഴകിയ മീനും എണ്ണയും കണ്ടെടുത്തതോടെ പൂട്ടിട്ടു. വിവിധ ജില്ലകളിലായി വഴിയോര ഭക്ഷണശാലകളിലേക്കും തട്ടുകടകളിലേക്കും പരിശോധന വ്യാപിപ്പിച്ചു.
ഗ്രാമ പ്രദേശങ്ങളിലും നഗര പ്രദേശങ്ങളിലും സ്‌ക്വാഡുകൾ രൂപീകരിച്ചാണ് പരിശോധന. ചെക്‌പോസ്റ്റുകൾ, കടകൾ, മാർക്കറ്റുകൾ, ഭക്ഷ്യ നിർമാണ കേന്ദ്രങ്ങൾ എന്നിവ കേന്ദ്രീകരിച്ച് റെയ്ഡുകൾ ശക്തമാക്കി.

'നല്ല ഭക്ഷണം നാടിന്റെ അവകാശം' എന്ന ക്യാംപെയ്‌ന്റെ ഭാഗമായി മീനിലെ മായം കണ്ടെത്താൻ 'ഓപ്പറേഷൻ മത്സ്യ', ശർക്കരയിലെ മായം കണ്ടെത്താൻ 'ഓപ്പറേഷൻ ജാഗറി' എന്നിവ ആവിഷ്‌ക്കരിച്ച് പരിശോധനകൾ ശക്തമാക്കി. വെളിച്ചെണ്ണ, കറി പൗഡറുകൾ, പാൽ തുടങ്ങിയ ഭക്ഷ്യ വസ്തുക്കളും പ്രത്യേകമായി പരിശോധിക്കുന്നുണ്ട്. സംസ്ഥാന വ്യാപകമായി ഇന്നലെ 349 പരിശോധനകളാണ് നടത്തിയത്. ലൈസൻസോ രജിസ്‌ട്രേഷനോ ഇല്ലാത്ത 32 കടകൾക്കെതിരേ നടപടി സ്വീകരിച്ചു. 119 സ്ഥാപനങ്ങൾക്ക് നോട്ടീസ് നൽകി. 22 കിലോഗ്രാം വൃത്തിഹീനമായ മാംസം പിടിച്ചെടുത്ത് നശിപ്പിച്ചു. 32 സാംപിളുകൾ പരിശോധനയ്ക്കയച്ചു. കഴിഞ്ഞ ആറു ദിവസങ്ങളായി 1,132 പരിശോധനകളാണ് നടത്തിയത്. ലൈസൻസോ രജിസ്‌ട്രേഷനോ ഇല്ലാത്ത 142 കടകൾക്കെതിരേ നടപടി സ്വീകരിച്ചു. 466 സ്ഥാപനങ്ങൾക്ക് നോട്ടീസ് നൽകി. 162 കിലോഗ്രാം വൃത്തിഹീനമായ മാംസം പിടിച്ചെടുത്ത് നശിപ്പിച്ചു. 125 സാംപിളുകൾ പരിശോധനയ്ക്കയച്ചൂ.
ഓപ്പറേഷൻ മത്സ്യയുടെ ഭാഗമായി ഇതുവരെ 6,035 കിലോഗ്രാം പഴകിയതും രാസവസ്തുക്കൾ കലർന്നതുമായ മത്സ്യം നശിപ്പിച്ചു. 4,010 പരിശോധനകളിൽ 2,014 സാംപിളുകൾ ശേഖരിച്ചു. ശർക്കരയിൽ മായം കണ്ടെത്താനായി ആവിഷ്‌ക്കരിച്ച ഓപറേഷൻ ജാഗറിയുടെ ഭാഗമായി 458 സ്ഥാപനങ്ങൾ പരിശോധിച്ചു. വിദഗ്ധ ലബോറട്ടറി പരിശോധനയ്ക്കായി ശർക്കരയുടെ അഞ്ച് സാംപിൾ ശേഖരിച്ചു. ആറു പേർക്ക് നോട്ടീസ് നൽകി. ഹൈക്കോടതിയിൽ നിന്നും പൊതു സമൂഹത്തിൽ നിന്നും വിമർശനം കടുത്തതോടെയാണ് മുടങ്ങിപ്പോയ പരിശോധനകൾ പുനരാരംഭിച്ചത്.