കോഴിക്കോട്: സാമൂഹികമാധ്യമത്തിലൂടെ പരിചയപ്പെട്ട മലയാളി യുവാവിനെ തേടിയെത്തിയ റഷ്യന്‍ യുവതി കെട്ടിടത്തില്‍നിന്ന് ചാടി ആത്മഹത്യയ്ക്ക് ശ്രമിച്ചു. ഇവര്‍ കോഴിക്കോട് മെഡിക്കല്‍ കോളേജിലെ തീവ്രപരിചരണ വിഭാഗത്തില്‍ ചികിത്സയിലാണിപ്പോഴുള്ളത്. പേരാമ്പ്ര കൂരാച്ചുണ്ടില്‍ ആണ് സംഭവം. അതേ സമയം യുവതി അപകടനില തരണം ചെയ്തതായി ഡോക്ടര്‍മാര്‍ അറിയിച്ചു.

സാമൂഹികമാധ്യമത്തിലൂടെ പരിചയപ്പെട്ട മലയാളി യുവാവിനെ തേടി മൂന്നുമാസം മുമ്പാണ് റഷ്യന്‍ യുവതി കൂരാച്ചുണ്ടിലെത്തിയത്. തുടര്‍ന്ന് ആണ്‍സുഹൃത്തിനൊപ്പം കൂരാച്ചുണ്ട് കാളങ്ങാലിയില്‍ താമസിച്ചുവരികയായിരുന്നുവെന്നു പറയുന്നു. അതേസമയം, യുവതിയുടെ ആണ്‍സുഹൃത്തിനെ ഇതുവരെ കണ്ടെത്താന്‍ കഴിഞ്ഞിട്ടില്ലെന്നും റിപ്പോര്‍ട്ടുണ്ട്. കഴിഞ്ഞദിവസമാണ് കൂരാച്ചുണ്ടിലെ കെട്ടിടത്തില്‍ നിന്ന് യുവതി താഴേക്ക് ചാടിയത്.

ഇവരുടെ മൊഴി രേഖപ്പെടുത്താന്‍ കഴിഞ്ഞിട്ടില്ല. അതുകൊണ്ടുതന്നെ കേസ് രജിസ്റ്റര്‍ ചെയ്തിട്ടില്ല. വാര്‍ഡിലേക്ക് മാറ്റിയശേഷം യുവതിയുടെ മൊഴി രേഖപ്പെടുത്തുമെന്നാണ് പൊലിസ് നല്‍കുന്ന സൂചന.