കുവൈത്ത് സിറ്റി: മലയാളികൾ ഉൾപ്പെടെ പ്രവാസികൾക്കും സ്വദേശികൾക്കും മുന്നറിയിപ്പുമായി കുവൈത്ത് അധികൃതർ. രാജ്യത്ത് പ്രതിദിനം 200 ലധികം ഇലക്ട്രോണിക് തട്ടിപ്പുകൾ നടക്കുന്നതായും അവയിൽ വീഴരുതെന്നുമാണ് മുന്നറിപ്പ്. കുവൈത്ത് സൊസൈറ്റി ഫോർ ഇൻഫർമേഷൻ സെക്യൂരിറ്റിയുടെ തലവൻ ഡോ. സഫാ സമാൻ ആണ് ഇക്കാര്യങ്ങൾ വ്യക്തമാക്കിയത്.

സാമ്പത്തിക ഇടപാടുകളുമായി ബന്ധപ്പെട്ടാണ് ഇലക്ട്രോണിക് തട്ടിപ്പുകൾ നടക്കുന്നത്. ഇത്തരം തട്ടിപ്പുമായി ബന്ധപ്പെട്ട് നിരവധിപേർക്കാണ് പണം നഷ്ടമാകുന്നത്. അതേസമയം, 200 ലധികം തട്ടിപ്പുകൾ നടക്കുന്നുണ്ടെങ്കിലും 60-80 കേസുകൾ മാത്രമാണ് പ്രതിദിനം ഔദ്യോ​ഗികമായി റിപ്പോർട്ട് ചെയ്യുന്നതെന്നാണ് വിവരം. മിക്കവരും ഇത്തരം തട്ടിപ്പുകൾ പുറത്തുപറയാറില്ല.

ദുർബലമായ നിയമങ്ങളാണ് ഇലക്ട്രോണിക് തട്ടിപ്പുകളെ തടയാൻ ഉള്ളത്. ഇലട്രോണിക് തട്ടിപ്പ് നടത്തുന്നവർക്കെതിരെ കാര്യമായ ശിക്ഷ നൽകാത്തതും തിരിച്ചടിയാകുന്നുണ്ട്. ഡാറ്റ വിൽപന വ്യാപിച്ചതാണ് തട്ടിപ്പ് വർധിക്കാൻ മറ്റൊരു കാരണമായി അധികൃതർ കണക്കാക്കുന്നത്.

സൈബർ സുരക്ഷാ വെല്ലുവിളികളെക്കുറിച്ചുള്ള രണ്ടാം ഗൾഫ് കോൺഫറൻസിൽ അവതരിപ്പിച്ച ശിൽപശാലകളുടെയും ഗവേഷണങ്ങളുടെയും അടിസ്ഥാനത്തിൽ ആഗോളതലത്തിൽ ഹാക്കിംഗ് ശ്രമങ്ങളും സൈബർ ആക്രമണങ്ങളും നേരിടുന്ന കാര്യത്തിൽ യുഎഇക്കും സൗദി അറേബ്യയ്ക്കും ശേഷം കുവൈത്ത് മൂന്നാം സ്ഥാനത്താണ്.

കൂടുതല്‍ ഗള്‍ഫ് വാര്‍ത്തകള്‍ ലഭിക്കാന്‍ സുപ്രഭാതം വാട്‌സാപ്പ് കമ്യൂണിറ്റിയില്‍ ജോയിന്‍ ചെയ്യുക: https://chat.whatsapp.com/HVpI8bKnwZA7O8fvza77sv