തലമുടി കൊഴിയുന്നുണ്ടോ.? എന്തൊക്കെ ഉപായങ്ങളാണ് നിങ്ങള്‍ പരിഹാരമായി ചെയ്യുന്നത്. ചെയ്യാത്തത് എന്തൊക്കെയാണ്. ? അങ്ങാടിമരുന്നുകളും നാടന്‍ രീതികളും മുതല്‍ മുടികൊഴിച്ചില്‍ തടയാന്‍ എത്രയെത്ര രീതികള്‍ പരീക്ഷിച്ചു. എന്തെല്ലാം ഓയിലുകള്‍ പുരട്ടി. എന്നിട്ടും പരിഹാരമുണ്ടോ ? ചോദിച്ചാല്‍ ഇല്ലെന്നാണുത്തരം അല്ലേ. എന്നാല്‍ ഇതാ ഒന്നല്ല രണ്ടു പരിഹാരം കൂടി. ഇതൊന്നു പരീക്ഷിച്ചുനോക്കൂ.

അതിനു മുമ്പ് എന്തുകൊണ്ടാണ് മുടി കൊഴിയുന്നത്. ? അറിയുമോ ? കാലാവസ്ഥ പ്രധാന കാരണമാണ് മുടി കൊഴിച്ചിലിന്, മാനസിക സമ്മര്‍ദം മറ്റൊരു കാരണവും. ഹോര്‍മോണ്‍ വ്യതിയാനം മൂലവും മുടികൊഴിച്ചിലുണ്ടാകുന്നു. ഇവിടെയൊക്കെ ഷാമ്പുവോ പ്രമുഖ കമ്പനികളുടെ ഓയിലോ പരീക്ഷിച്ചാല്‍ പരിഹാരമുണ്ടാകില്ല. മനസിന്റെ അസുഖത്തിന് ചികിത്സിക്കുകയാണ് ആദ്യം വേണ്ടത്. ഹോര്‍മോണ്‍ വ്യതിയാനത്തിന്റെ കാരണം കണ്ടെത്തി ചികിത്സിക്കണം. ആ പ്രശ്‌നത്തിന് പരിഹാരമായാല്‍ മുടികൊഴിച്ചിലിനും പരിധിവരേ പരിഹാരമാകും.

അങ്ങനെ പല കാരണങ്ങളാണ് മുടികൊഴിച്ചിലിന്റെ കാരണങ്ങളായി എണ്ണുന്നത്. ഇനിയും വ്യക്തമാകാത്ത കാരണങ്ങളും കാണും. ഓരോ ദിവസവും എല്ലാവരിലും അയ്യായിരത്തിലേറെ മുടി കൊഴിയുന്നുവെന്നാണ് പറയുന്നത്. കേട്ടപ്പോള്‍ ഞെട്ടിയോ? എന്നാല്‍ സത്യമാണെന്നാണ് വിദഗ്ധര്‍ പറയുന്നത്. എണ്ണം കൂടിയാല്‍ വലിയ പ്രശ്‌നമാണെന്നും മുന്നറിയിപ്പ് നല്‍കുന്നുണ്ട്.

നെല്ലിക്കയിലെ ഔഷധം പ്രശസ്തമാണ്. ചുക്കില്ലാത്ത കഷായം ഇല്ലെന്നു പറഞ്ഞതുപോലെ നെല്ലിക്കയില്ലാത്ത ഔഷധവുമില്ല. എന്നാല്‍ മുടികൊഴിച്ചിലിനും നെല്ലിക്ക ബെസ്റ്റാണ്. നെല്ലിക്ക താരനെ അകറ്റും. മുടിയുടെ തിളക്കം കൂട്ടും. മുടിയെ പരിപോഷിപ്പിക്കും. നെല്ലിക്കയിലെ കാല്‍സ്യം ആരോഗ്യമുള്ള മുടിയെ പ്രോത്സാഹിപ്പിക്കുന്നു. ഇത് മുടി കൊഴിച്ചില്‍ കുറയ്ക്കാന്‍ സഹായിക്കുന്നു. ഭക്ഷണത്തില്‍ നെല്ലിക്ക ചേര്‍ക്കുന്നത് ഓക്‌സിഡേറ്റീവ് സ്‌ട്രെസ് കുറയ്ക്കാനും കാരണമാകുന്നുണ്ട്.

മുടിയുടെ ആരോഗ്യം വര്‍ധിപ്പിക്കുന്ന ഒട്ടേറെ സവിശേഷതകള്‍ നെല്ലിക്കയിലുണ്ട്. ഇത് ചര്‍മ്മത്തിന്റെ ആരോഗ്യം മെച്ചപ്പെടുത്തുന്നു. മുടിയെ പോഷിപ്പിക്കുന്നു. താരന്‍ കുറയ്ക്കാന്‍ സഹായിക്കുന്നു. നെല്ലിക്കയിലെ വിറ്റാമിന്‍ സി ശരീരത്തിലെ ആന്റിഓക്‌സിഡന്റുകള്‍ ഇരട്ടിപ്പിക്കുന്നു. താരന്‍ മൂലമുണ്ടാകുന്ന ചൊറിച്ചില്‍ അകറ്റാന്‍ കഴിയുന്ന ആന്റിഇന്‍ഫ്‌ളമേറ്ററി, ആന്റി ബാക്ടീരിയല്‍ ഗുണങ്ങളും നെല്ലിക്കയിലുണ്ട്.

ഉലുവയും മുടിക്ക് മികച്ച പരിചരണം നല്‍കുന്നു. മുടികൊഴിച്ചില്‍ നിയന്ത്രിക്കാനും ഉലുവ ഉത്തമമാണ്. കുറച്ച് ഉലുവ രാത്രി മുഴുവന്‍ വെള്ളത്തിലിട്ട് അരച്ച് പേസ്റ്റ് രൂപമാക്കണം. നെല്ലിക്ക പൊടി ചേര്‍ത്ത് മുടിയില്‍ തേക്കാം. 15 മിനുട്ടിന് ശേഷം കഴുകി കളയാം. നെല്ലിക്ക ചര്‍മ്മം വൃത്തിയാക്കും. മുടിക്ക് തിളക്കം നല്‍കും. അകാല നരയില്‍ നിന്ന് മുടിയെ സംരക്ഷിക്കുവാനും കഴിയും.