കോഴിക്കോട്: ന്യൂനപക്ഷ സ്‌കോളര്‍ഷിപ്പിലെ 80:20 അനുപാതം കോടതി റദ്ദ് ചെയ്തതോടെ മുന്നോക്ക ക്രൈസ്തവര്‍ക്ക് ലഭിക്കുന്നത് ഇരട്ടനേട്ടം. ജനസംഖ്യാനുപാതികമായി പദ്ധതി വിഹിതം പുനര്‍നിശ്ചയിക്കണമെന്നാണ് കോടതി ഉത്തരവ്. ഇതുപ്രകാരം ന്യൂനപക്ഷങ്ങള്‍ എന്ന പരിഗണനയില്‍ മുഴുവന്‍ ക്രൈസ്തവര്‍ക്കും ഇതിന്റെ ആനുകൂല്യം ലഭിക്കും.

നേരത്തെ മുന്നോക്കം എന്ന പരിഗണനയില്‍ ലഭിച്ചുകൊണ്ടിരിക്കുന്ന ആനൂകുല്യങ്ങള്‍ മുന്നോക്ക ക്രൈസ്തവര്‍ക്കു ലഭിക്കുന്നത് തുടരുകയും ചെയ്യും. ഇതോടെ മുന്നോക്ക ക്രൈസ്തവര്‍ക്ക് ലഭിക്കുന്നത് ഇരട്ടനേട്ടമാകും.

കോടതി ഉത്തരവ് നടപ്പാക്കിയാല്‍ മുസ്‌ലിം സമുദായത്തിനു ലഭിച്ചിരുന്ന 80 ശതമാനം ആനുകൂല്യം 58.67 ആയി ആയി കുറയും. ക്രിസ്ത്യന്‍ സമുദായങ്ങള്‍ക്ക് മൊത്തമായി 40.67 ശതമാനം ലഭിക്കുകയും ചെയ്യും. അതേസമയം, ലത്തീന്‍ കത്തോലിക്ക, പരിവര്‍ത്തിത ക്രിസ്ത്യന്‍ വിഭാഗങ്ങള്‍ക്ക് ലഭിച്ചുകൊണ്ടിരിക്കുന്ന വിഹിതത്തില്‍ കുറവു വരും.

മുന്നോക്ക വിഭാഗം എന്ന രീതിയില്‍ സംസ്ഥാന മുന്നോക്ക വികസന കോര്‍പറേഷന്റെ കീഴിലുള്ള സമുന്നതിയുടെ എല്ലാ ക്ഷേമപദ്ധതികളും മുന്നോക്ക ക്രൈസ്തവര്‍ക്കും ലഭിക്കുന്നുണ്ട്.

സമുന്നതിയിലൂടെ വിദ്യാഭ്യാസ സ്‌കോളര്‍ഷിപ്പുകള്‍, പരിശീലന കേന്ദ്രങ്ങള്‍, ബിസിനസ് സംരംഭകത്വ വായ്പകള്‍, വിദ്യാഭ്യാസ വായ്പകള്‍ എന്നിവയും ലഭിക്കുന്നു.

മുന്നോക്ക ക്രൈസ്തവര്‍ 10 ശതമാനം സാമ്പത്തിക സംവരണത്തിന്റെ ആനൂകൂല്യവും നേടുന്നുണ്ട്. സിറോ മലബാര്‍, സിറോ മലങ്കര, ഓര്‍ത്തഡോക്‌സ്, യാക്കോബൈറ്റ്‌സ്, മാര്‍ത്തോമ സിറിയന്‍ വിഭാഗങ്ങളിലുള്ളവര്‍ എല്ലാ മുന്നോക്ക ക്ഷേമപദ്ധതികളുടേയും ഉപഭോക്താക്കളാണ്.