തിരുവനന്തപുരം: സംസ്ഥാന വിനോദസഞ്ചാര വകുപ്പിന് കീഴിലുള്ള വിനോദസഞ്ചാര കേന്ദ്രങ്ങളിൽ മുതിർന്ന പൗരൻമാർക്ക് ഇനി മുതൽ അൻപത് ശതമാനം ഫീസ് ഇളവ് ലഭിക്കും. ഇതുസംബന്ധിച്ച സർക്കാർ ഉത്തരവ് പുറത്തിറങ്ങി. നിയമസഭയുടെ മുതിർന്ന പൗരൻമാരുടെ ക്ഷേമം സംബന്ധിച്ച സമിതി മുമ്പാകെ കോഴിക്കോട് ഹ്യൂമൻറൈറ്റ്‌സ് ഫോറം പ്രസിഡന്റ് സമർപ്പിച്ച ഹർജിയിലാണ് ഫീസ് ഇളവ് നൽകണമെന്ന ആവശ്യം ഉന്നയിച്ചത്. ഇത് വിശദമായി പരിശോധിച്ച ശേഷമാണ് സർക്കാർ ഉത്തരവിറക്കിയത്.
മുതിർന്ന പൗരൻമാർക്ക് സൗഹൃദമായി സംസ്ഥാനത്തുടനീളം നടപ്പിലാക്കുന്ന പദ്ധതികളുടെ ഭാഗമായാണ് ഈ തീരുമാനമെടുത്തതെന്ന് വകുപ്പ് മന്ത്രി പിഎ മുഹമ്മദ് റിയാസ് പറഞ്ഞു. മഹാമാരിയുടെ പശ്ചാത്തലത്തിൽ വീടുകളിൽ കഴിഞ്ഞിരുന്ന മുതിർന്ന പൗരൻമാർക്ക് സമൂഹവുമായി ഇടപഴകുന്നതിന് ഈ ഇളവ് പ്രോത്സാഹനമേകുമെന്നും അദ്ദേഹം വ്യക്തമാക്കി.