വടക്കാഞ്ചേരി: നഗരസഭയുടെ നിരോധന ഉത്തരവ് മറികടന്ന് ആവശ്യമായ അനുമതിയില്ലാതെ നടക്കുന്ന പാര്‍ളിക്കാട് നടരാജഗിരി ബാല സുബ്രഹ്മണ്യ സ്വാമി ക്ഷേത്രത്തിന്റെ പുനരുദ്ധാരണ നിര്‍മാണ പ്രവര്‍ത്തനങ്ങള്‍ നിര്‍ത്തി വെക്കണമെന്ന് ഹൈക്കോടതി ഉത്തരവ്. വാഴാനി സ്വദേശി സി.ടി ജയകുമാര്‍ കോടതിയില്‍ സമര്‍പ്പിച്ച ഹര്‍ജിയിലാണ് ജഡ്ജി കെ വിനോദ് ചന്ദ്രന്റെ ഉത്തരവ് നേരത്തെ നിര്‍മാണ പ്രവര്‍ത്തനങ്ങള്‍ നിര്‍ത്തി വെക്കണമെന്ന്  ആവശ്യപ്പെട്ട് നഗരസഭ സെക്രട്ടറി  ക്ഷേത്ര സമിതി പ്രസിഡന്റ് സെക്രട്ടറി എന്നിവര്‍ക്ക് കത്ത് നല്‍കിയിരുന്നു.  
സി.ടി ജയകുമാറിന്റെ  പരാതിയെ തുടര്‍ന്നായിരുന്നു  നടപടി.  ക്ഷേത്ര നിര്‍മാണം നടക്കുന്നത് നഗരസഭയുടെ അനുമതി ഇല്ലാതെയാണെന്നാണ് ജയകുമാര്‍ പരാതി നല്‍കിയിരുന്നത്. ഇതിന്റെ അടിസ്ഥാനത്തില്‍ നടത്തിയ അന്വേഷണത്തില്‍ പരാതി ശരിയാണെന്ന് കണ്ടെത്തിയിരുന്നു.  
നിര്‍മാണ പ്രവര്‍ത്തനങ്ങള്‍ നിര്‍ത്തിവെച്ച്  നഗരസഭ ഓഫിസില്‍ റിപ്പോര്‍ട്ട്  ചെയ്യണമെന്നും ബില്‍ഡിങ് പെര്‍മിറ്റ് എടുത്തതിന് ശേഷം മാത്രം  പ്രവര്‍ത്തനം നടത്തിയാല്‍ മതിയെന്നുമാണ് ക്ഷേത്ര ഭാരവാഹികളെ അറിയിച്ചിരുന്നത്.
എന്നാല്‍ നഗരസഭയുടെ അറിയിപ്പ് അവഗണിച്ചും എസ് .എന്‍.ഡി.പി തലപ്പിള്ളി താലൂക്ക്  യൂനിയന്റെ നേതൃത്വത്തില്‍ നിര്‍മാണ പ്രവര്‍ത്തനങ്ങളുമായി മുന്നോട്ട് പോവുകയായിരുന്നു ഇതിനെതിരേയാണ് ഹര്‍ജിക്കാരന്‍ കോടതിയെ സമീപിച്ചത് .